Помидор үсентеләрен ничек ныгытырга: өй шартларында эффектив ашламалар

Фото: Рәзилә Хәйретдинова, «ЯҮ»

Бәрәңге пешкән су — витаминнар чыганагы

Тәрәзә төбендәге «бакчагызны» бәрәңге пешергән су белән ашларга була. Әлбәттә, иң мөһим шарт — су тозсыз булырга тиеш. Тозлы су үсемлек тамырларын «пешерергә» мөмкин.

Үсентеләрне бәрәңге суы белән ашлауның өстенлеге: су эчендәге крахмал һәм минераль матдәләр (калий, фосфор) тамыр үсешен стимуллаштыра.

Кулыгызда бәрәңге кабыгы булса: аларны да пешереп, шул суны кулланырга ярый. Кайбер тәҗрибәле бакчачылар суга бер-ике тамчы йод та өстәргә киңәш итә. Йод — үсентеләрнең иммунитетын ныгытучы микроэлемент.

Куллану тәртибе: бәрәңге суын салкынлатып, үсентеләрне чәчәк савыты яки аерым кәстрүлчәләрдә гадәти су сибкән кебек сибәргә. Ашлауны атнага бер-ике тапкырдан да еш башкармагыз.

Банан кабыгы — табигый «минераль комплекс»

Банан кабыгын ашлама итеп куллану — дөньякүләм танылган халык ысулы. Банан кабыгы составында калий, магний, фосфор, азот, кальций күп, һәм бу элементлар үсентеләрнең яшь чәчәкләре өчен бик кирәкле.

Ничек әзерләргә һәм кулланырга?

• Банан кабыкларын юыгыз.
• Пычак яки кайчы белән вак кына турагыз яки кисегез.

Үсентене яңа урынга күчергәндә эш итегез:

• Чүлмәк төбенә бер катлам туфрак салыгыз.
• Туралган банан кабыгын сибегез.
• Кабат туфрак өстәгез.
• Үсентегезне шул туфракка утыртыгыз.

Туфрак эчендә банан кабыгы таркала бара — бу процесс вакытында аның составындагы бөтен файдалы элементлар тамырларга барып җитә. Өстәвенә, черегәндә кабык микроскопик күләмдә җылылык бүлеп чыгара, бу исә тамыр системасының үсешен тагын да тизләтә.

Нәтиҗә: үсентеләр күчереп утыртканнан соң тизрәк тернәкләнә һәм күз алдында үсеп китә.

Суган кабыгы төнәтмәсе — авырулардан саклаучы калкан

Суган кабыгы – бәясе аз, әмма файдасы зур ашлама. Ул өч төрле эш башкара:

• Туйдыра – микроэлементлар, фитонцидлар, витаминнар бирә.
• Саклый – авырулардан (черү, көлсу, фитофтороздан) саклый.
• Куркыта – тля, үрмәкүч кенәсе, башка бөҗәк-корткычларны куркыта.

Суган кабыгыннан төнәтмә әзерләү рецепты

• 1 стакан кипкән суган кабыгы
• 2 стакан кайнар су

Әзерләү:

• Кабык өстенә су салып, кайнатып чыгарыгыз.
• Уттан алып, капкач белән ябыгыз һәм 2 көнгә төнәтергә куегыз.
• Төнәтмәне сөзегез.
• Җылы су кушып, гомуми күләмне 10 стаканга (ягъни 2-2,5 литр) җиткерегез.

Куллану:

Атнага бер тапкыр даими ашлау өчен, әзер төнәтмәне сибәргә.

Әгәр үсентеләрдә авыру билгеләре (яфраклар саргаю, көлсу бөрчекләр) яки корткычлар күренсә — төнәтмәгә бер чәй кашыгы сыек сабын өстәгез, яхшылап болгатыгыз. Бу катнашманы пульверизатор белән яфракларга һәм сабакларга сибәргә.

Киңәш: сабынлы төнәтмәне сипкәндә, кояш көчле булмаган кичке яки иртәнге сәгатьләрне сайлагыз, яфраклар көюдән саклансын.

Өйдә үскән помидор, кыяр, башка яшелчә үсентеләрен ныгыту өчен кыйммәтле ашламалар сатып алу мәҗбүри түгел. Бәрәңге пешкән су, банан кабыгы, суган кабыгы төнәтмәсе — менә сезнең экологик һәм бик нәтиҗәле «ике ярдәмчегез». Бу ысуллар гасырлар дәвамында тикшерелгән, бакчачыларның ышанычлы ярдәмчеләре.