Танылган блогер ханымның улын ваннага төшкән смартфон үтергән

Зарядкада торган смартфоннан ток сугу популяр арт-блогер Анастасия Сосновская улының үлеменә сәбәп булган. Фаҗига турында хатын-кыз Инстаграмда үз битендә язган.

Бала 10 гыйнварда ук һәлак булган. Тик хәзер генә, судмедэкспертиза уздырганнан соң, аның үлеменең сәбәбе билгеле була. Сосновская сөйләгәнчә, 12 яшьлек баланың корсагына телефон бер секундка гына килеп төшә.

Малай аны идәнгә атарга өлгерә, ләкин соң була. Аны 40 минут реанимацияләргә тырышып карыйлар, ләкин малайны коткарып кала алмыйлар.

- Бу ток сугу белән бәйле. Ваннада. Зарядкада торган телефоннан. Кечкенә генә айфонның батареясе тиз утыра иде, бер генә секундка корсагына төшә. Улым аны идәнгә атарга өлгерә, ләкин соң була. Мин һәр кешенең белүен телим: әйе, моннан үләләр, - дип кисәтә ата-аналарны блогер ханым.