«Халык инспекторы»нда татарстанлылар 5,6 млн сум эшләп өлгергән: иң югары сумманы Казан кешесе алган

Бу вакыт эчендә татарстанлылар түләүле 7 категория буенча 12 меңнән артык гариза биргән һәм 5,6 млн сум эшләп өлгергән.

Рекордсмен булып 226 гариза җибәреп, 275 мең сум алган республика кешесе торган. Икенче урында – 209 гариза белән 260,8 мең сум эшләп алган кулланучы.

«Халык инспекторы» системасында татарстанлылар Дәүләт автоинспекциясенең ярдәмчеләренә әйләнә һәм административ хокук бозуларны вакытында ачыкларга ярдәм итә.

«Бүген «Халык инспекторы» кушымтасы — ул юл-транспорт кагыйдәләрен бозу очраклары турында хәбәр итү юлы гына түгел, ә Татарстан юлларында куркынычсызлыкны арттыруның реаль коралы да. Һәрберебез дөрес булмаган тукталышны, куркыныч машина йөртүчене күреп, теркәгәндә, без бергәләп бер-беребезне юл һәлакәтләреннән, җәрәхәтләрдән саклыйбыз, хәтта гомерләрне коткарабыз. Кушымтада 199 меңнән артык уникаль кулланучы теркәлгән, иң яше – 17 яшьтә, иң тәҗрибәлесе – 67 яшьтә», – дип сөйләде Татарстан цифрлы үсеш министры Илья Начвин.

Кушымтада штрафлар суммасының 25 процентын алып була, система гаризаны эшкәртүне тизләтер өчен, урынны автомат рәвештә билгели.

Искәрмә:
«Халык инспекторы» дәүләт мәгълүмат системасы Татарстанда 2014 елда ЮХИДИ бозуларны һәм төзекләндерүне видеога теркәү өчен эшләтеп җибәрелде. 2024 елның сентябрендә кушымтаның яңартылган версиясе чыкты, ул җиде категория буенча бозу турында хәбәр иткән өчен акчалата бүләк алырга мөмкинлек бирә:

• светофорның кызыл сигналына узу;
• каршы як полоса буйлап хәрәкәт итү;
• светофорның тыю сигналы вакытында стоп-сызык артына чыгу;
• хәрәкәт вакытында телефон куллану;
• эләктерелмәгән куркынычсызлык каешы;
• җәяүлене уздырмый калдыру;
• транспорт чарасыннан чүп ташлау.

Татарстан Республикасы Цифрлы үсеш министрлыгының матбугат хезмәте