Татарстанның Баш ветеринария идарәсе читтән терлек кертү кагыйдәләре һәм биоиминлек турында искәртте

Фото: Рәзилә Хәйретдинова,"ЯҮ"

Ведомство мәгълүматларына караганда, терлекләрне читтән кертү бары тик Татарстан Республикасы Министрлар Кабинетының Баш ветеринария идарәсе белән килештерелгәннән соң гына рөхсәт ителә.

Терлекләрнең һәр партиясенә ветеринария документлары тутырылырга тиеш, шул исәптән 1-нче номерлы формадагы таныклык та мәҗбүри. Терлекләр кертелгәннән соң алар 30 көнлек карантин узарга тиеш.

Хуҗалар, үз чиратында, хуҗалыкның биологик иминлеген тәэмин итәргә бурычлы:

· территорияне периметр буенча койма белән әйләндереп алырга;
· кергәндә транспортны дезинфекцияләүне оештырырга;
· хезмәткәрләрне санитария пунктлары аша киемнәрен алыштырып үткәрергә;
· терлекләр тотыла торган урыннарга чит кешеләрне кертмәскә.

Баш ветеринария идарәсе шулай ук пастереллез авыруы турында кисәтте. Бу — терлек һәм кошлар арасында югары дәрәҗәдә йогышлы авыру. Ул зарарланган предметлар һәм әйләнә-тирәлек белән контакт аша күчә, үпкә ялкынсынуы, ринит, артрит, конъюнктивит һәм диарея кебек авыртулар китереп чыгара ала.

Инкубация чоры — 14 тәүлеккә кадәр, эре мөгезле терлекләрдә исә 90 көнгә җитәргә мөмкин. Инфекция чыганагы авыру хайваннар да, тышкы яктан сәламәт күренгән йөртүчеләр дә була ала.

Ведомствода билгеләп үтелгәнчә, Татарстан пастереллез буенча имин территория булып кала. Шуңа да карамастан, хайваннарда яки кошларда авыру булуына шик туса, хуҗаларны кичекмәстән район ветеринария хезмәтенә яки идарәнең кайнар линиясенә мөрәҗәгать итәргә чакыралар.