Татарстанда журналистларның медиа Сабантуе узды

Республиканың төрле почмакларыннан килгән журналистлар Сабантуй мәйданына ял итәргә, милли ярышларда көч сынашырга, аралашырга һәм милли ризыклардан авыз итәргә җыелды. Кунаклар өчен үзенчәлекле күчтәнәч тә әзерләнгән иде – махсус рецепт буенча пешерелгән гаять зур бәлеш.

Бәйрәм Черемшан авылында узды. Бирегә республиканың төрле районнарыннан «Татмедиа» җәмгыяте филиаллары коллективлары килгән иде. Кунакларны милли йортлар, төрле сый-нигъмәтләр, җыр-моң һәм җирле үзешчән сәнгать коллективларының чыгышлары каршы алды.

Программаның иң зур үзенчәлеге – диаметры бер ярым метр булган суган бәлеше булды. Оста хуҗабикәләр сөйләвенчә, аны әзерләү өчен 50 килограмм суган, 60 килограмм йомырка, 5 литр кефир, май һәм майонез тотылган. Бәлеш махсус рецепт буенча пешерелгән һәм 40 минут эчендә әзер булган. Нәтиҗә исә көтелгәннән дә яхшырак чыккан. Бәлешнең беренче кисәге «Казанские ведомости» хәбәрчесе Елизавета Черкинага эләккән, ул аны шунда ук татып карап, үзенчәлекле тәмен югары бәяләгән.

Төш вакытына мәйданны чын үзбәк пылавының хуш исе биләп алды. Аны 15 ел буе әлеге эш белән шөгыльләнүче Мирза исемле оста пешекче әзерләгән. Пылау ике сәгать пешсә дә, пешекче әйтүенчә, ул биш минут эчендә таралып бетә. Кунаклар моның чыннан да шулай булуын раслады.

Бәйрәмдә катнашучыларны «Татмедиа» җәмгыятенең генераль директоры Шамил Садыйков һәм Черемшан районы башкарма комитеты җитәкчесе Илнур Замалетдинов сәламләде.

– Черемшан муниципаль районы башлыгы Рамил Айбатов исеменнән һәм шәхсән үз исемемнән сезгә бүген күңелле ял итүегезне телим. Сабантуй күтәренке кәеф, шатлык һәм матур хатирәләр бүләк итсен, – диде Илнур Замалетдинов.

Шамил Садыйков исә журналист хезмәтенең республика өчен әһәмиятен ассызыклады:

– Бүген Татарстан тормышын «Татмедиа» һәм журналистларыбыздан башка күз алдына китерү мөмкин түгел. Республикабызның һәр шәһәрендә, һәр авылында редакцияләребез эшли. Журналистлар төбәк үсешенә зур өлеш кертә.

Бәйрәмнең иң истәлекле мизгелләренең берсе – республика редакцияләре, министрлыклар һәм ведомстволарның матбугат хезмәтләре коллективлары парады булды. Һәр команда үзен тәкъдим итте һәм Сабантуй бәйгеләре җиңүчеләренә милли бүләкләр әзерләде.

Медиа Сабантуй ахырында массакүләм мәгълүмат чараларының иң яхшы хезмәткәрләрен бүләкләү тантанасы узды. Алар арасында «Казанские ведомости» редакциясе вәкилләре дә бар иде.

Бәйрәм чын мәгънәсендә гаилә җылысын, милли рухны берләштергән чарага әверелде: җырлар, биюләр, халык уеннары һәм мул табын һәркемгә күтәренке кәеф бүләк итте. Шамил Садыйков билгеләп үткәнчә, журналистларны алда тагын күп эшләр көтә, әмма нәкъ менә шундый бәйрәмнәр яңа көч һәм илһам бирә.

Медиа Сабантуй бәйгеләре җиңүчеләрен бүләкләүдә Татарстанның Черемшан районы башлыгы Рамил Айбатов һәм «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев катнашты.

Казанские ведомости