Медицина хезмәткәрләренә ай саен 50 мең сумга кадәр өстәмә түләү каралган

Фото: Чулпан Гыйсмәтуллина, «ЯҮ»

Россия Социаль фондының төбәк бүлекчәсе республика дәүләт учреждениеләренең сәламәтлек саклау системасында эшләүче белгечләренә гомуми суммасы 496 мең сумнан артык булган өстәмә акча юнәлтте.

Әлеге финанс ярдәме ай саен күрсәтелә һәм амбулатор звено, ашыгыч ярдәм хезмәтендә эшләүче табибларны, шәфкать туташларын колачлый. Нәкъ менә бу белгечләр пациентларның төп агымы белән эшли, даими интенсив хезмәт режимында була.

Түләү күләме кемгә һәм ничек билгеләнә?

Махсус түләүләрнең күләме 4,5 меңнән 50 мең сумга кадәр җитә. Сумма хезмәткәрнең категориясенә, эшли торган медицина учреждениесенең профиленә турыдан-туры бәйле.

Бу акчалар:

• тәҗрибәле белгечләргә,
• яшь табибларга һәм шәфкать туташларына,
• өлешчә мәшгульлек шартларында эшләүче медицина хезмәткәрләренә дә

каралган.

Мөһим үзенчәлек: бу түләүләр физик затлар керемнәренә салым салудан азат ителгән һәм хезмәткәрнең уртача хезмәт хакын исәпләгәндә исәпкә алынмый.

Акча ничек күчерелә?

Түләү процедурасы гади һәм уңайлы итеп оештырылган:

Медицина оешмалары җитәкчелеге ай саен хезмәткәрләренең реестрын әзерли.

Электрон документта хезмәткәр, сумма һәм эшчәнлек күрсәткечләре турында мәгълүмат була.

Социаль фонд структуралары акчаны банк счетларына 7 эш көне эчендә күчерә.

Хезмәткәр «Дәүләт хезмәтләре» порталындагы шәхси кабинетында күчерү турында белдерү ала.

«Яшь кадрларны һөнәрләрендә беркетү өчен кызыксындыру факторы»

Россия Социаль фондының Татарстан буенча бүлекчәсе җитәкчесе Эдуард Вафин бу хакта түбәндәгеләрне белдерде:

«2026 ел башыннан безнең ведомство тарафыннан төбәк медицина хезмәткәрләренә 496 мең сумнан артык акча юнәлдерелде. Әлеге махсус түләүләр медицина хезмәткәрләренең авыр хезмәте өчен сизелерлек ярдәм һәм яшь кадрларны сайлап алынган һөнәрләрендә беркетү өчен кызыксындыру факторы булып тора».

Белешмә өчен

Социаль ярдәм, түләүләр һәм хезмәт күрсәтү чаралары турында тулы мәгълүматны Россия Социаль фондының Татарстан бүлеге сайтында һәм социаль челтәрләрдәге рәсми аккаунтларда (ВКонтакте, Одноклассники, Телеграм) табып була.

Өстәмә мәгълүмат яки консультация алу өчен гражданнар 8 800 100 0001 телефоны буенча бердәм контакт-үзәк операторларына мөрәҗәгать итә ала. Төбәк линиясе тәүлек буе, 24/7 эшли, шалтырату бушлай.