Без Җирне яратабыз: Мулла Илендә «Җирдән алып йолдызларга кадәр» викторинасы узды

Бу дата кешеләргә безнең уртак йортыбызның гаҗәп матур, шул ук вакытта бик нәзберек икәнен искә төшерә. Җир көне — экологик проблемаларга игътибарны җәлеп итү, табигатькә сакчыл караш тәрбияләү, әйләнә-тирә мохитне саклау өчен көч куярга берләштерү моменты.

— Без, мәдәният йорты коллективы, бу көнне игътибарсыз калдыра алмадык. «Оста куллар» түгәрәгенә йөрүче балалар белән бергә «Җирдән алып йолдызларга кадәр» дип аталган мавыктыргыч викторина уздырдык, – дип сөйли Мулла Иле мәдәният йорты сәнгать җитәкчесе Гөлназ Гыйззәтуллина.

«Оста куллар» түгәрәге — гади генә түгел, ул — табигатькә мәхәббәт, чисталык һәм матурлык тәрбияләү мәктәбе. Балалар монда кул эшләре белән шөгыльләнергә, табигый материаллардан әйберләр ясарга, әйләнә-тирәне күзәтергә өйрәнә. Шуңа да Җир көне алар өчен бик якын һәм аңлаешлы.

Викторинаны әзерләгәндә, экологиянең иң мөһим өч юнәлеше сайланды:

• урманнарның файдасы (һаваны чистарту, хайваннар өчен йорт, кеше өчен дәвалау үсемлекләре);
• һава проблемалары (заводлар, автомобильләр чыгарган төтен, һаваның пычрануы, аның сәламәтлеккә йогынтысы);
• су ресурсларын саклау (елгалар, күлләр, саф суның бөтен тереклек өчен әһәмияте).

Викторина уен формасында оештырылды. Балалар ике командага бүленеп, сорауларга җавап бирде, өстәмә баллар өчен кызыклы фактлар сөйләде.

— Бу чараның «Җирдән алып йолдызларга кадәр» дип аталуы да юкка түгел — чөнки без Җирне генә түгел, Галәмнең башка почмакларында да тормыш булу ихтималы, планетабызны саклау — бу космик бурыч, дигән фикергә килдек, – дип белдерде Гөлназ Гыйззәтуллина.

Викторина ахырында балалар экологик плакатлар ясады һәм паркка яки мәктәп бакчасына агачлар утыртырга вәгъдә итте.