Хач ману коенулары: кемгә ярый, кемгә ярамый

Фото: ясалма интеллект

Күп кенә дин тотучылар өчен 18 гыйнвардан 19ына каршы төндә традицион рәвештә бәкедә коену гадәткә кергән.

Бәйрәм алдыннан Роспотребнадзор Хач ману коенулары үткәреләчәк сулыкларда су сыйфатын лаборатор тикшерү оештыра. Коену табигый сулыкларда яки махсус җиһазландырылган купельләрдә башкарыла. Әмма күп кешеләр бу гамәлнең сәламәтлек өчен каршы күрсәтмәләрен һәм мөмкин булган тискәре нәтиҗәләрен уйлап та карамый.

Кышкы салкында бәкедә коену хәтта нык һәм сәламәт кеше организмы өчен дә зур стресс булып тора. Шуңа күрә Роспотребнадзор мондый чаралар вакытында куркынычсызлык кагыйдәләрен төгәл үтәргә чакыра.

Төп саклану чаралары

Коену бары тик рәсми рәвештә җиһазландырылган урыннарда гына үткәрелергә тиеш. Андый урыннарда коткару һәм медицина хезмәтләре хезмәткәрләре кизү тора.

Суга керер алдыннан артериаль кан басымын үлчәп, аның нормаль булуына инанырга кирәк. Купельгә кергәнче саф һавада бераз торып, тәнне җылытып алу мөһим. Саклану өчен суда бер минуттан да артык калмаска киңәш ителә.

Суга аяклар белән генә төшәргә кирәк. Баш белән чуму баш мие тамырларының кискен кысылуына һәм аңны югалтуга китерергә мөмкин. Судан чыкканда тоткычлардан тотыныгыз яки тирә-юньдәгеләрнең ярдәмен кабул итегез. Коенганнан соң коры сөлге белән яхшылап сөртенеп, җылы кием киегез һәм җылы бинага керегез.

Алкоголь – катгый тыела

Алкоголь куллану катгый рәвештә тыела, чөнки ул кан тамырларын киңәйтә, нәтиҗәдә кеше тизрәк җылылыгын югалта. Моннан тыш, нерв системасында импульсларның әкренәюе хәрәкәтләрнең тоткарлануына китерә, ә йөрәккә йөкләнеш арта. Җылыну өчен иң яхшы чара – бал, имбирь, әфлисун кабыгы, лимон яки гөлҗимеш кушылган кайнар чәй. Коенуга берничә сәгать кала тукланып алу да организмга җылыну өчен кирәкле энергия бирә.

Кемнәргә ярамый

Бәкедә коену йөрәк-кан тамырлары, үзәк һәм периферик нерв системасы, сулыш юллары, ашказаны-эчәк тракты, сидек-җенес системасы авырулары булган кешеләргә, шулай ук борын-йоткылыкның ялкынсыну чирләре һәм эндокрин авырулар вакытында каршы күрсәтелә. Балаларга, йөкле хатын-кызларга һәм өлкән яшьтәгеләргә бәкедә коену катгый рәвештә тәкъдим ителми.