ЮХИДИ татарстанлыларга транспорт чараларын теркәү кагыйдәләре һәм техник күзәтү узу вакыты турында искә төшерде

Фото: Чулпан Гыйсмәтуллина, «ЯҮ»

Яңа автомобиль, мотоцикл яки прицепны теркәү

Исәпкә кую өчен транспорт хуҗасына гариза, сату-алу килешүе, шәхесне раслаучы документ, вәкаләтнамә (әгәр вәкил аша мөрәҗәгать итсә) һәм дәүләт пошлинасын түләү квитанциясен тәкъдим итү зарур.

Теркәү сатып алганнан соң 10 көн эчендә башкарылырга тиеш. Сроклар бозылган өчен штрафлар каралган:

• гражданнар өчен – ике мең сумга кадәр;
• вазыйфалы кешеләр өчен – 3,5 мең сумга кадәр;
• юридик шәхесләр өчен – 10 мең сумга кадәр.

Кулланылган автомобильне теркәү

Кулланылган автомобильләр өчен өстәмә рәвештә ПТС яки ЭПТС, теркәү таныклыгы һәм диагностик карта (транспорт чарасына дүрт елдан артыграк булса) таләп ителә.

Чит илдән китерелгән автомобильне теркәү

Чит илдән автомобиль кайтарылган очракта, пассажир-таможня декларациясенең төп нөсхәсен таможня органы билгесе белән һәм, кирәк булганда, таможня-керем ордерын тәкъдим итү зарур (мотоцикллар һәм прицеплар өчен). Калган документлар пакеты стандарт теркәү белән бердәй.

ЮХИДИ шулай ук техник күзәтүнең вакытын искә төшерде. Җиңел автомобильләр һәм мотоцикллар беренче дүрт ел дәвамында ТК үтмиләр, аннары ике елга бер тапкыр, ә ун елдан соң – ел саен узалар.

Таксилар, автобуслар һәм пассажирлар ташучы транспорт өчен кыскартылган интерваллар билгеләнгән, ә куркыныч йөкләр ташу өчен махсуслаштырылган транспорт чаралары алты ай саен күзәтү узалар.

Дәүләт пошлинасы күләме

Яңа автомобильне теркәү өчен дәүләт пошлинасы күләме кәгазь ПТС рәсмиләштергәндә 5 025 сум, ә электрон документ кулланганда 4 500 сум тәшкил итә. Мотоцикллар һәм прицеплар өчен сумма 3 750 дән 4 275 сумга кадәр үзгәрә.

Моннан тыш, ведомство транспорт чаралары дәүләт реестрыннан күчермәләр бәясен искә төшерде: киңәйтелгән электрон күчермә бушлай бирелә, кәгазь күчермә 100 сум тора, ә кыскартылган һәм шәхси күчермәләр – 200 дән 400 сумга кадәр.

ЮХИДИ транспорт чаралары хуҗаларына алдан ведомствоның рәсми сайтында транспортны чикләүләргә тикшерергә, Дәүләт хезмәтләре порталы аша язылырга һәм килгәнче гаризаны бастырып алырга тәкъдим итә. Транспорт чарасын тикшерү нәтиҗәләре 30 көн дәвамында гамәлдә.

Татар-информ