Гаилә, мәхәббәт һәм тугрылык көнендә ветеран Кави Хәсәнов 101 яшьлек юбилеен билгеләп үтә
Казан шәһәрендә яшәүче Бөек Ватан сугышы ветераны һәм тыл хезмәтчәне Кави Хәсәнов бүген үзенең 101 яшьлек туган көнен билгеләп үтә. Бу хакта Татарстан Хезмәт, мәшгульлек һәм социаль яклау министрлыгының матбугат хезмәте хәбәр итә.
Кави Басыйр улы 1925 елның 8 июлендә Чиләбе өлкәсендә крестьян гаиләсендә дөньяга килә. Гаиләдә җиде бала үсә. 1927 елда алар Чиләбегә күченәләр, һәм Кави шунда мәктәпкә укырга керә. Җиде сыйныф тәмамлагач, №9 һөнәр училищесында белем ала.
1943 елның март аенда ул үз теләге белән армия сафларына китә. Беренче Балтыйк буе фронтында сугыша, Смоленск һәм Белоруссия өлкәләрен азат итүдә катнаша. Полоцкны азат иткәндә кулыннан пуля ярасы ала. Ике ай госпитальдә дәваланганнан соң яңадан фронтка кайта һәм Украина фронтындагы аерым элемтә батальонында хезмәтен дәвам итә.
1945 елның 8 апрелендә Кави Хәсәнов кыйпылчык җәрәхәте ала. Шуннан соң демобилизацияләнә.
1950 елда гаилә кора. Тормыш иптәше белән алар 53 ел бергә гомер итәләр, ике кыз тәрбияләп үстерәләр.
Сугыштан соң Кави Басыйр улы «Полет» җитештерү берләшмәсендә слесарь булып хезмәт куя. Шулай ук Чиләбе автомобиль транспорты техникумында эшләп, студентларга гамәли дәресләр алып бара. 1987 елда Казан шәһәренә күченеп килә.
Кави Хәсәнов Дан ордены, Хезмәт Кызыл Байрагы ордены, I дәрәҗә Ватан сугышы ордены, шулай ук «Батырлык өчен», Венаны алган өчен, Будапештны алган өчен, Германияне җиңгән өчен медальләре белән бүләкләнгән.
Автор: Наталья Рыбакова
Татар-инфор
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев