Каюм Насыйри эзләреннән: Кече Шырдан авылында Бөтендөнья татар конгрессыннан кунаклар каршы алдылар

Сәяхәтнең иң кызык өлеше – Сабантуй мәйданында узды. Акъегет авылы мәдәният хезмәткәрләре хөрмәтле кунакларны традицион татар күчтәнәчләре, икмәк-тоз белән каршы алды. Милли көйләр яңгырады, бизәкле тастымаллар, түбәтәйләр, чигелгән сөлгеләр – бөтен атмосфера татар халкының юмартлыгын һәм кешелеклелеген чагылдырды.

Кунаклар өчен аерым «Кече Сабантуй» бәйрәме оештырылды. Бу – зур Сабантуйның миниатюрасы, ләкин күңеллелеге белән шулкадәр үк бай.

Кунаклар бик теләп милли уеннарда катнаштылар.

«Бөтендөнья татар конгрессы өчен нәкъ менә мондый саф, милли рухлы чаралар аеруча кадерле, – диде кунакларның берсе. – Без бу сәяхәт аша татар авылының гүзәллеген, халкыбызның саф күңелен, өлкәннәрнең акыллы киңәшләрен, яшьләрнең утлы егәрлеген тойдык».

Мәдәният хезмәткәрләре, үз чиратында, мондый очрашуларның әһәмиятен ассызыкладылар: «Бу – гыйлем һәм дуслык күпере. Без Каюм Насыйри рухына тугрыбыз».