Ямьле яз бәйрәме: Тау Илендә күңелле чара узды
Яз — табигать уяну, яңа өметләр һәм шатлык вакыты! Һәр яңа көн, һәр елмаю, һәр чәчәк — барысы да яхшылыкка өндәп тора. Нәкъ менә шундый якты хисләр белән Тау Иле мәдәният йорты аланлыгында балалар өчен «Ямьле яз бәйрәме» узды.
Бәйрәм иртәнге саф һавада башланды. Балалар, әти-әниләре белән бергә, татар милли уеннары уйнадылар. Куыш, әйлән-бәйлән, түбәтәй ташлау, чикләвек җыю кебек уеннар балаларда гына түгел, әти-әниләрдә дә зур кызыксыну уятты. Чөнки бу уеннар күпләрнең үз балачагына кайтып төшүе иде.
Гөрләшеп уйнап, көлә-көлә арыгач, барысы да ямьле чәй өстәле артында җыелдылар. Олылар һәм балалар чәй эчеп, тәмле ризыклардан авыз итте. Ә чәй өстәленең иң матур бизәге — Галия Әдиятуллина пешергән пылау иде.
Бәйрәм ахырында Тау Иле мәдәният йорты мөдире Гөлфинә Сәлахова барлык катнашучыларга җылы теләкләрен белдерде:
«Мондый күңелле очрашулар еш булсын! Дус-тату, бергә булыйк. Чөнки бердәмлектә генә безнең көч, язмышыбызның яктылыгы һәм балаларыбызның шатлыклы киләчәге».
«Ямьле яз бәйрәме» — ул бары тик уеннар һәм ризыклар гына түгел, ул — бердәмлек, дуслык, милләт һәм кешелеклелек бәйрәме. Табигатьнең матур бер көнендә, ачык аланда җыелып, бер-беребезгә елмаю бүләк итү — иң кыйммәтле нәрсә.
Тау Иле мәдәният йорты алга таба да мондый изге, күңелле чаралар оештырырга вәгъдә итә.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев