Йомшак кәтлит пешерү серләре

Фото: ясалма интеллект

• Берничә төрле ит кушсаң, котлеталар тәмлерәк килеп чыга. Барысын берьюлы кушарга дигән сүз түгел бу, кимендә ике төрле иттән ясагыз.
• Тарткычтан ике кат чыгарылган ит йомшаграк булыр.
• Күпләр фаршка сөт кушабыз, диләр. Аш-су осталары исә сөт урынына кайнаган җылы су өстәсәң әйбәтрәк, диләр.
• Котлеталар тәмле килеп чыгуның тагын бер сере – фаршка йомырканың сарысын гына өстәүдә. Агы белән бергә кушсаң, котлеталар корырак була.
• Суганны күбрәк кушкан саен – котлеталар тәмлерәк килеп чыга. Аны иттарткыч аша чыгару һәм вак итеп тураунының аермасы да бар икән.
• Күп хуҗабикәләр фаршка тозны итне иттарткычтан чыгаруга кушалар. Ашыкмагыз! Тозны котлеталарны әвәләр алдыннан гына өстәгез: котлеталарның йомшак булу-булмавы моңа да бәйле.
• «Фаршка ипи кушу мәҗбүри түгел», – диләр аш-су осталары, аны теләсә нинди яшелчә белән алыштырырга тәкъдим итәләр: мәсәлән, кәбестә, бәрәңге, кишер белән. Әгәр инде ипи кушарга уйлагансыз икән, аны сөттә түгел, ә кайнаган җылы суда җебетегез: сөт кулланганда котлеталар корырак килеп чыга.
• Кайбер аш-су осталары котлеталарга дигән иткә уып алма да салалар. Ясап карагыз, бәлки алманың әчкелтем тәме сезгә дә ошар.
• Котлеталарны кара борыч кушмыйча ясамыйлар, ә менә сарымсак һәм башка тәмләткечләрне кушаргамы-юкмы икәнен һәр хуҗабикә үзе хәл итә.
• Котлеталар сусылрак булсын өчен, кайбер хуҗабикәләр аңа аз гына сыер яисә сарык мае, майонез яки куе каймак та өстиләр.
• Котлеталарны бары тик кызган майда гына кыздырырга икәнен бөтен хуҗабикә дә беләдер инде?
• Әгәр сезгә ошый икән, панировка өчен төелгән сохарый яки он кулланырга мөмкин: бу очракта кәтлитләрнең эче сусылрак, тәмлерәк килеп чыгачак.
• Фарш кулга ябышмасын өчен, әвәләр алдыннан кулларны юешләп алырга кирәк. Шундук кызган табага салырга да була.
• Әвәләгән котлеталарны күпертелгән йомырка агына манып аннан панировкада аунатсаң, алар тагын да тәмлерәк булачак.
• Бер ягын кыздырып, икенче ягына әйләндергәч, табаның капкачын ябырга мөмкин.

Өмет