Коймак бәйрәме: тәмле дә, файдалы да

Илсөя Садыйкова фотосы

Ләкин сәламәт туклану яклаучыларына нишләргә? Коймак, әлбәттә, файдалы ризык түгел, аны күп ашау зыян. Калориясе дә югары. Әмма акыл белән эш итеп, бәйрәмне дә уздырып, сәламәтлекне дә саклап була. Моның өчен нәрсә эшләргә?

Иң элек, коймакны сөттән генә түгел, ә суда, майсыз сөттә пешерегез. Йомырка сарысын аз салыгыз, шикәрне дә күп салмагыз. Камырга йомырка сарысы урынына шпинат, кишер, чөгендер суы кушсагыз, коймаклар матур төскә керә һәм файдалырак була. Калорияле эчлекләрдән тыелыгыз – ит, эремчек, яшелчә, җиләк-җимеш кулланыгыз.

Элек Россиядә коймакны ике төрле оннан: карабодай һәм бодай оннарыннан пешергәннәр. Бүген дә шулай эшләсәгез, бик шәп булыр. Карабодай оны бодайга караганда файдалырак, чөнки анда витаминнар күбрәк. Бөтен бөртекле оннар да ярый.

Майны аз салып кына пешерегез. Эчлеккә майсыз ит, эремчек (5% лы), яшелчә, алма кебек җимешләр салыгыз.

Бераз киңәшләр:

Шикәрне рецептагыча түгел, ә яртысын гына салыгыз.

Берьюлы 100 граммнан (2-3 коймактан) артык ашамагыз. Бәйрәм көннәрендә дә туклану төрле булырга тиеш.

Ачыткылы коймаклар зарарлы түгел. Аларны содага алыштыруның мәгънәсе юк.

Эчәк-ашказаны авырулары булса, коймакны кайнар килеш ашамагыз, бераз суытыгыз.

Коймакны чәй белән эчегез. Чәй ашказаны эшчәнлеген яхшырта, майлы ризыкны сеңдерергә ярдәм итә.

Урамда коймак сатып алганда, сак булыгыз. Сатучының тышкы кыяфәтенә карагыз: ул чиста киенгән, башлыклы, алъяпкычлы  булырга тиеш. Кулларына перчатка кигән, яисә кулларын еш юып тора. Эш урыны пөхтә. Акча алгач, перчаткаларын алыштырамы, юындымы – игътибар итегез.

Урамда пешкән коймакны шунда ук ашарга киңәш ителә. Эчлекле коймак сатып алмагыз, аеруча ит, эремчек, балык белән. Алар тиз бозыла, ә урамда саклау шартлары начар.

Әгәр ярымфабрикатлар сатып алсагыз, сатучыдан документлар сорарга хакыгыз бар. Әзер коймакның упаковкасы бөтен булырга тиеш, этикеткасында составы, ясалу һәм яраклылык вакыты, саклау шартлары күрсәтелгән булсын. Составын укыгыз – он, сөт, йомырка булуы яхшы.

Коймак ашаганчы кулларны юыгыз, антисептик белән эшкәртегез.

Ныклы сәламәтлек һәм күңелле бәйрәм телибез!