Татарстанда балалар катнашында юл-транспорт фаҗигаләрен булдырмау максатыннан «Игътибар – балалар!» дигән профилактика чарасы уздырыла

Фото: ясалма интеллект

Соңгы мәгълүматлар буенча, 16 яшькә кадәрге балалар катнашында 90 юл-транспорт һәлакәте теркәлгән. Бу аварияләрдә 1 бала һәлак булган һәм 97се төрле дәрәҗәдәге җәрәхәтләр алган.

Нинди чаралар үткәрелә?

Татарстан Республикасы буенча Эчке эшләр министрлыгының Дәүләт автоинспекциясе «Игътибар – балалар!» чарасы кысаларында түбәндәге эшләрне оештыра:

– автомобильләрдә балаларны йөртү кагыйдәләре бозылуны профилактикалауга юнәлдерелгән тикшерү;

– йөртүчеләрнең җәяүлеләргә өстенлек бирмәүләренә бәйле юл хәрәкәте кагыйдәләре бозылуны профилактикалау;

– яктылык кайтаргыч элементларны популярлаштыру;

– кече яшьтәгеләр тарафыннан юл хәрәкәте кагыйдәләре бозылуны кисәтүгә юнәлдерелгән акцияләр (ачыкланган фактлар турында мәгълүмат алга таба профилактика эше алып бару өчен мәгариф оешмаларына җибәреләчәк);

– балаларның юлда үзләрен имин тоту мәсьәләләре буенча Дәүләт автоинспекциясе хезмәткәрләре катнашында ата-аналар җыелышы;

– сәламәтләндерү лагерьларында балаларның юлда куркынычсыз йөрү күнекмәләрен ныгыту өчен конкурслар, викториналар һәм башка чаралар уздыру.

ЮХИДИ өндәве

Дәүләт автоинспекциясе барлык юл хәрәкәте катнашучыларын бик сак һәм игътибарлы булырга чакыра.

Ата-аналар үз балаларының иминлегенә җитди карарга тиеш. Аларның куркыныч тудырырга мөмкин булган урыннарда, шул исәптән юллар янында, күзәтүсез калмавы турында кайгыртырга кирәк.

Россия Федерациясенең Юл хәрәкәте кагыйдәләренең 22.9нчы пунктына ярашлы, җиңел автомобильдә һәм йөк автомобиле кабинасында 7 яшькә кадәрге балаларны йөртү аның авырлыгына һәм буена туры килә торган җайланмаларын (автокресло) кулланып башкарылырга тиеш. Дәүләт автоинспекциясе балаларны 7 яшь тулгач та, махсус урындыкта йөртү кирәклеген искәртә.

Исегездә тотыгыз!

Балалар – юл хәрәкәтенең иң яклаучысыз катнашучылары.

Дәүләт автоинспекциясе һәр гаиләне балаларның тормышы һәм сәламәтлеге өчен җаваплы булырга чакыра.