Питбайклар иң куркыныч транспорт чарасы: Унтугыз фаҗига һәм ике юл корбаны

Яшел Үзәндә юл хәрәкәте имин­леге комиссиясенең киңәйтелгән утырышының да ул төп темаларның берсе булды.

Районда юл-транспорт һә­ла­кәтләренең сәбәпләрен ана­лиз­лау күрсәткәнчә, агым­дагы елның 5 аенда 19 очрак теркәлгән, аларда 2 кеше һәлак булган. 2024 елның шул ук чорында 16 фаҗига чыгып, 8 кешенең гомере өзелгән.

– Балалар катнашында юл-транспорт фаҗигаләрен профилактикалау безнең уртак эшчәнлекнең өстенлекле юнә­леше булып тора. Узган ел нә­тиҗәләре буенча Татарстан Республикасында мондый ава­рияләр күрсәткечләренең кимүе билгеләп үтелде. Яшел Үзән районында быел 4 юл-транспорт һәлакәте булган, аларда 4 бала җәрәхәтләнгән. Күпчелек очракта мондый фаҗигаләрдә баланың гомерен саклау өчен мөмкин булганның барысын да эшләмәгән ата-аналар гаепле була. Коллегалар, бигрәк тә балигъ булмаганнарга автомототранспорт, шул исәптән төрле питбайклар белән идарә итүне булдырмауга игътибар бирүегезне со­рыйм, – диде комиссия уты­ры­шын­да катнашкан Эчке эшләр министрлыгы Дәүләт автоинспекциясенең юл хәрәкәте өлкәсендә адми­нистратив хокук бозуларны автоматлаш­тырылган теркәү үзәге җитәк­чесе Руслан Вәлиев.

– Мондый хәлләрне булдыр­мас өчен без урыннарга чыга­быз, беренче чиратта ата-ана­лар, аннан соң балалар белән әңгәмәләр корабыз. Яшел Үзән муниципаль районының профилактика бүлеге җитәк­чесе Зөлфия Шакирова белән мәктәпләргә барып, юл хәрәкә­те кагыйдәләре темасына ачык дәресләр үткәрәбез. Вәзгыятькә тамырдан йогынты ясау өчен юл-патруль хезмәте инспекторлары штабын арттырырга кирәклеген билгеләп үтәм. Бу бигрәк тә авыл җирлекләренә кагыла, – диде Яшел Үзән районы ЮХИДИ бүлеге җитәкчесе Рамил Идия­туллин.

Яшел Үзән районында җирле әһәмияттәге юлларның гомуми озынлыгы якынча 1122 км тәшкил итә. Аларда куркынычсызлыкны тәэмин итү өчен төрле чаралар үткәрелә, шул исәптән юлларны ремонтлау да.

Быел төрле программалар кысаларында 14 авыл җир­легендә автомобиль юлларын ремонтлау планлаштырыла. «Өй-мәктәп-өй» балалар хәрәкәте маршрутларын җиһазлау чараларына аерым игътибар бирелә: тротуарлар һәм ясалма тигезсезлекләр, юл билгеләре, җәяүлеләр ки­чүләре, мәктәп автобуслары өчен тукталышлар урнаштыру. Урамнарны яктыртуны ях­шырту буенча эшләр алып барыла, – дип аңлатты Төзелеш һәм инфраструктура үсеше департаменты җитәкчесе урынбасары Регина Ясельская.

Утырыш барышында исе­рек машина йөртүчеләр кат­нашында авария очрак­ларының ешаюын билгеләп үттеләр.

Фото: ясалма интеллект программасыннан алынды