ТР Мәгариф һәм фән министрлыгында «дистанционка»ның белем сыйфатына йогынты ясавы турында сөйләделәр

Укуның дистацион форматы белем бирү сыйфатына һәм БДИ нәтиҗәләренә тәэсир итәргә тиеш түгел, дип саный ТР мәгариф һәм фән министры Рафис Борһанов. Бу хакта ул Андрей Кузьминга биргән интервьюсында хәбәр итте.

"Сүз тугызынчы һәм унберенче сыйныф укучылары турында бара. Бу сыйныф укучылары, еш кына, үзләренең әзерлекләрен сынау өчен дистанцион форманы куллана. Өстәвенә, алар нинди югары уку йортларына керәчәген белә. Югары уку йортларына керергә кем әзерләнә, аларның зур проблемалары булмас дип уйлыйм. Көчле укучылар, бәлки, имтиханны яхшырак та тапшырырлар, әмма бу минем фаразлар. Мин нәтиҗәләрнең узган еллардагыга караганда начаррак булмавын, белемнең сыйфаты югалмавын теләр идем», - диде министр.

Борһанов, шулай ук, хәзер дүртенче чирек бара, балалар үткән материалны кабатлыйлар, дип билгеләп үтте. Эксперт фикеренчә, студентларның дистанцион уку вакытында өлгереше зыян күрергә тиеш түгел.

Рафис Борһанов белән әңгәмәне «События» сайтында укыгыз. Видеоверсияне YouTube тагы “Татар-информ” мәгълүмат агентлыгының каналында күрергә мөмкин булачак. «Андрей Кузьмин белән галстуктан башка интервью» программасында әңгәмәнең телевизион вариантын тамашачылар шимбә көнне 18.30 сәгатьтә, якшәмбе көнне 13.30 сәгатьтә карый алачак.