ТР Яшьләр министрлыгы үз йортын төзүче яшьләр өчен торак программасы әзерли

Фото: ясалма интеллект

Бу хакта «Татар-информ» агентлыгының баш редакторы Ринат Билаловка «12нче кат» проектында биргән интервьюсында ТР яшьләр эшләре министры Азат Кадыйров хәбәр итте.

«Яшь гаиләләргә шәхси торак төзелешендә ярдәм итү программасына ихтыяҗ бик зур. Без 2026 елда Татарстанда шундый программа булдыру инициативасы белән чыгарга телибез. Шулай ук безнең инициативаларның берсе — авыл җирендә яшәүче яшьләр өчен ислам ипотекасы мөмкинлеге», — дип белдерде ул.

Аның сүзләренчә, Татарстан яшьләре өчен торак мәсьәләсе иң актуаль булып кала. Республикада дүрт профильле программа гамәлгә ашырыла, аларның берсе — федераль.

«Шулай ук яшь белгечләр һәм галимнәр өчен ярдәм чаралары бар. Шул ук вакытта ихтыяҗ барыбер югары кала», — дип ассызыклады министр.

Арсений Каримов, Татар-информ