Татарстанда психология-педагогик ярдәм үзәкләрен капиталь ремонтлау планы үтәлде

Программа кысаларында Татарстан Республикасы Рәисе Рөстәм Миңнеханов күрсәтмәсе буенча бу максатлар өчен 300 млн сум акча бүлеп бирелгән. Бу хакта республиканың элеккеге яшьләр эшләре министры Ринат Садыйков хәбәр итте.

Капиталь ремонт эшләре Татарстан Республикасының яшьләр сәясәте оешмаларын ремонтлау программасы кысаларында башкарылды, бу «Яшьләр һәм балалар» милли проектының максатларына туры килә.

«Быел программа кысаларында өч психология-педагогик ярдәм үзәгендә капиталь ремонт эшләре алып барылды, шулай ук Казанда алты үзәк — «Ышаныч» үзәгенең филиаллары заманча җиһазлар белән тәэмин ителде. Безнең өчен яшьләргә якын булу һәм кирәкле вакытта аларга ярдәм кулы сузу бик мөһим. Яшь кеше үзенең борчылуларын һәрвакыт якыннарына яки дустына сөйли алмый. Психология-педагогик ярдәм үзәкләрендә алар югары квалификацияле белгечләрдән профессиональ ярдәм ала алалар. Моңа ирешү өчен без инфраструктураны яхшыртуны дәвам итәбез. Яшьләр инфраструктурасын яңарту программасы «Яшьләр һәм балалар» милли проекты максатларына туры килә», — диде Ринат Садыйков.

Мәсәлән, Чистай шәһәрендәге «Статус» үзәгендә ремонттан соң релаксация һәм психологик разгрузка кабинеты, психокоррекция өчен арт-терапия төркеме һәм шәхси дәресләр уздырыла торган бүлмә, тренинглар һәм чаралар үткәрелешле зал, консультацияләр бүлмәсе барлыкка килде. Монда махсус хәрби операциядә катнашучыларның тормыш иптәшләре һәм әниләре өчен релаксация сеанслары, киндергә рәсем ясау һәм ком белән эшләү мастер-класслары, буллингны профилактикалау буенча интерактив дәресләр, шәхси киңәшләр үткәрелә.

Шулай ук Яшел Үзән районы Осиново авылында психология-педагогик ярдәм үзәге ачылды. Анда киңәш итү бүлмәсе, сенсор бүлмәсе эшли. 1380 кв. м мәйданлы бина чын мәгънәсендә яшьләр өчен иҗади киңлеккә әверелде. Монда яшьләр гончарлык остаханәсендә, дизайн һәм графика, инженерия, киберспорт бүлмәләрендә вакыт үткәрә ала.

Тагын бер психология-педагогик ярдәм үзәге Сарман районы Җәлил бистәсендә ачылачак. 1105,8 кв. м мәйданлы ике катлы бинаны ремонтлауга 88 млн сумнан артык акча бүлеп бирелгән. Биредә психолог кабинетлары, гаилә терапиясе бүлмәсе, остаханә, китапханә, шулай ук «ДоброЦентр», «Форпост» һәм «Беренчеләр хәрәкәте» берләшмәләре эшләячәк.

2022 елдан башлап Татарстанда яшьләр үзәкләрен капиталь ремонтлау һәм аларның материаль-техник базасын ныгыту программасы кысаларында 30 психология-педагогик ярдәм үзәге яңартылды, аларга барлыгы 905,15 млн сум акча бүлеп бирелгән. 2025 елда программага 4 муниципаль берәмлектән 9 үзәк кертелгән. 2026 елда 5 муниципалитетта шундый ук күләмдә финанслау белән тагын 5 үзәк эшләренә керешәчәк.