Татарстанда 300дән артык мәктәп укучысына җәйге бушлай сменалар тәкъдим ителә

Сменалар «Татарстан Республикасында талантлар белән стратегик идарә итү» дәүләт программасы кысаларында эшли. Алар «Яшьләр һәм балалар» илкүләм проектының бурычларына да туры килә. Бу хакта ТР Мәгариф һәм фән министрлыгының матбугат хезмәте хәбәр итә.

Программалар балаларның фән, олимпиада һәм иҗат өлкәсендә сәләтләрен үстерүгә юнәлдерелгән. 2026 елда катнашучылар өчен түбәндәге юнәлешләр ачык булачак:

• лингвистика;
• физика;
• химия;
• информатика;
• мультипликация һәм дизайн;
• музыкаль-башкару сәнгате;
• театр;
• рәсем сәнгате.

Талантлар университеты башкарма директоры Адилә Әхмәтова болай ди:

«"Акыллы каникуллар" форматында укучылар җәйге ялны файдалы итеп үткәрә. Алар яраткан фәннәрен тирәнтен өйрәнә, сәләтләрен үстерә һәм фикердәшләр мохитенә эләгә. Без программаларыбызда үсеш, ярдәм һәм илһам пространствосы булдырырга омтылабыз.»

Дәресләрне югары квалификацияле белгечләр алып бара. Алар арасында «Сириус» үзәге педагоглары, илнең алдынгы югары уку йортлары укытучылары, профильле компанияләр вәкилләре һәм профессиональ сәнгать эшлеклеләре бар.

Белем бирү программасына түбәндәгеләр керә:

• экспертлар белән дәресләр;
• практик интенсивлар;
• эшнең иҗади форматлары.

Сменада катнашучылар уңайлы шартларда яши, биш тапкыр туклана һәм медицина ярдәме ала. Мәйданчыкларда иминлекне сак хезмәткәрләре һәм кураторлар тәэмин итә.

Сменаларны «Казан талантлар ачык университеты 2.0» оештыра. Катнашу бушлай. Заявканы бер яки берничә сменага бирергә мөмкин.