Яшел Үзән ашыгыч медицина ярдәме фельдшерлары клиник үлем кичергән кешене терелткән

Ике йөрәк өянәген кичергән 70 яшьлек ир-атның йөрәге начарланган.
-Мин исән калмаячакмын, үләчәкмен, - дип каршы ала ул медикларны.
— Тик бу юлы түгел, - дип җавап бирә Руслан Мәрданов һәм бригада эшкә керешә.

Пациентның йөзе соры, кан басымы 60ка 40 — кардиогеник шок, ә кардиограмма кискен миокард инфарктын күрсәтә.
Ярдәм стандарт буенча, тромбларны эретүче препарат кертеп күрсәтелә. Шуңа да карамастан, хәл катлаулана: пациентны көзән җыера — ул гырылдый башлый, клиник үлем кичерә.

Аны идәнгә алып салалар һәм дефибриллатор ярдәмендә реанимацияли башлыйлар, шунда пациентның йөрәге туктый. Фельдшерлар тиз, бердәм эш итә. Һава биргеч урнаштырып, йөрәккә ябык массаж ясыйлар - сигезенче минутта пациент сулап куя һәм уяна.
Авыруны реанимациягә китерәләр.
— Ашыгыч ярдәм машинасында ни өчен эшләвеңне нәкъ менә шундый чакыруларда аңлыйсың, - ди Руслан Рәфыйкович. - Бик зур эмоцияләр аласың. Мин мондый авырлыкларны яратам. Команда эше дә мөһим: Наталья Викторовна белән без бер-беребезне сүзсез аңлыйбыз.

Нәрсә эшләргә кирәген һәркем белә.

- Фельдшерлар профессиональ рәвештә эшләде, - дип билгеләп үтте ашыгыч ярдәм станциясе мөдире Андрей Моисеев. - Шулай булырга тиеш тә. Бу нәкъ менә ашыгыч ярдәм профиле буенча экстрен чакыруларның берсе.