Блогерлар үзләре турында мәгълүматны Рос­комнадзорга тапшырырга тиеш: ноябрьдән законнардагы яңалыклар

Пенсияләр индексацияләнә

80 яшькә җитүчеләр пенсияләренә 8134 сум 88 тиен күләмендә өстәмә түләү алачак. Инвалидлык буенча пенсиягә шундый ук өстәмә беренче төркем инвалидларга биреләчәк. Моннан тыш, пенсияләр гражданлык авиациясе һәм күмер производстволарының элеккеге хезмәткәрләренә индексацияләнәчәк. Аның күләме стажга һәм эш шартларына бәйле.

Банк счетлары арасында күчерүләргә комиссияләр

2024 елның 1 ноябреннән Россия Үзәк Банкының физик затларның үз счетлары арасында күчерүләр өчен комиссияләр күләме турындагы карары үз көченә керә. Сүз физик затлар счетлары арасында тиз күчерүләр системасын куллану турында бара.

Әгәр гражданин үзенә банктагы бер счеттан башка банклардагы счетларга аена 30 миллион сумнан артык акча күчерә икән, аның өчен комиссия күчерү суммасының 0,5%ын тәшкил итәчәк, әмма 1500 сумнан артмаячак. Әлеге суммага кадәр комиссия салынмаячак.

Ватандашларга яшәүгә рөхсәт алу җиңелрәк булачак

7 ноябрьдән ватандашларны Россиягә күчүгә ярдәм итү программасы белән бәйле үзгәрешләр үз көченә керә.
Яңа кагыйдәләр буенча, Россия территориясенә даими күчеп килүче ватандашлар, вакытлыча яшәүгә рөхсәт алмыйча, шунда ук яшәүгә рөхсәт ала алачак. Димәк, киләчәктә алар өчен Россия гражданлыгын алу тәртибе дә гадиләштереләчәк.

Арбитраж идарәчеләрне яңача сайлаячаклар

23 ноябрьдән Россиядә Арбитраж судка бурычлының банкротлыгы турында гариза биргәндә арбитраж идарәчеләрен сайлау тәртибендә үзгәрешләр үз көченә керә.

Хәзер аларны шәхси рейтингы нигезендә сайлый башлаячаклар, ул аның шәхси кабинетында булачак. Рейтинг идарәче эшчәнлеге нәтиҗәлелеге критерийларыннан чыгып билгеләнәчәк, мәсәлән, бурычлының кредиторлар алдындагы йөкләмәләрен түләү дәрәҗәсе яки мөлкәтен дисконт белән сату нәтиҗәлелеге. Мондый яңалык арбитраж идарәчеләрнең эшчәнлеген профессиональрәк һәм бурычлының кредиторлары мәнфәгатьләренә җавап бирерлек итәргә мөмкинлек бирәчәк.

Янгыннарны сүндерү өчен төбәкләр җавап бирәчәк

26 ноябрьдән РФ субъектларының янгыннарга каршы көрәш өлкәсендәге вәкаләтләре киңәйтеләчәк. Төбәк хакимиятләре үз территорияләрендә табигый янгыннарны сүндерү планнарын мөстәкыйль рәвештә эшли һәм раслый башлаячак. Бу РФ субъектларының мөстәкыйльлеген арттырачак.

Урман янгыннарын сүндерүгә бәйле чараларны эшләү генә Федераль карамакта калачак. Россиянең аерым регионнары территориясендә планнарны эшләүне һәм тормышка ашыруны Россия Гадәттән тыш хәлләр министрлыгы контрольдә тотачак.

Майнинг белән барысы да шөгыльләнә алмаячак

Күптән көтелгән цифрлы валюта майнингы (криптовалюта эшләү) кагыйдәләре үз көченә керә. Майнинг белән махсус реестрга кертелгән юридик затлар һәм шәхси эшмәкәрләр генә шөгыльләнә алачак. Физик затларга майнинг бары тик электр энергиясен куллану законнар белән билгеләнгән лимитлардан артмаган очракта гына мөмкин булачак.
Майнингны гамәлгә ашыру авыр һәм аеруча авыр җинаятьләр, шулай ук икътисадый җинаятьләр өчен хөкем ителгән затларга тыелачак. Моннан тыш, аны электр энергиясен тапшыру, электр энергиясен җитештерү яки сату оператив-диспетчерлык идарәсе белән бергә алып бару тыелачак.
Аноним блогерлар реклама һәм донатлардан керемнәр ала алмаячак

Һәм, ниһаять, 1 ноябрьдән соңгы вакытта, мөгаен, законнардагы иң фикер алышына торган үзгәрешләрнең берсе үз көченә керәчәк. Алар Россия блогерлары эшчәнлеге белән бәйле. 10 меңнән артык язылучы аудиториясе булган социаль челтәрләрдә каналлар һәм пабликлар хуҗалары үзләре турында мәгълүматны Рос­комнадзорга тапшырырга тиеш булачак. Белешмәләрне тапшыру тәртибе әлеге контроль органы тарафыннан билгеләнәчәк. Мәгълүматлар бирелмәгән очракта, блогерларга рекламадан керемнәр алуны һәм донатлар җыюны тыячаклар. Моннан тыш, аларның битләреннән репостлар ясарга ярамаячак. Яңа закон интернетта үтә күренмәлелекне тәэмин итәргә һәм челтәрдә еш кына тыелган контент таратучы аноним блогерларны юк итәргә тиеш. Законнарны үтәүчеләр дәүләт контролендә үзләрен ышанычлырак хис итәчәк. Законнардагы мондый җитди үзгәрешләр безне соңгы көзге айда көтә. Әлегә безнең яңа хокукый чынбарлыкка әзерләнергә вакытыбыз бар әле.