Бүген Ломоносов исемендәге 18нче күп профильле лицейда «Дус сыйныф серләре» республика конкурсының муниципаль этабы узды. Бу бәйге — ата-аналар комитетларының бердәмлеген, иҗади куәтен һәм мәктәп белән гаилә арасындагы тыгыз элемтәне күрсәтүче зур вакыйга.
Биредә катнашкан 8 мәктәп арасында иң югары нәтиҗәне күрсәтеп, Гран-прига 5нче гимназия лаек булды!
Гран-при яулаган 5нче гимназиянең 6 В сыйныф җитәкчесе Зөлфирә Сәләхова үзенең хис-кичерешләре белән уртаклашты:
- «Бу җиңү — безнең сыйныфның гына түгел, әти-әниләребезнең дә бердәм булу нәтиҗәсе. Без бер команда булып эшләдек, бер-беребезгә терәк булдык», — диде ул.
Чыннан да, бердәм булганда гына шундый зур үрләргә ирешеп була!
Зөлфирә ханымны һәм аның искиткеч командасын чын күңелдән котлыйбыз!
Нет комментариев