Карагужа җирлеге Сабантуйга әзерләнә

11 июнь көнне уздырылачак, Карагуҗа җирлеген берләштерүче, күмәк, көтеп алган Сабантуебызга, һәркемнең үз өлешен кертү нияте белән, Күлбаш, Синтәк, Чүрчиле авылларында "Сөлге җыю", Сабантуйга бүләк җыю оештырылды.

-Бүгенге көндә авылларыбызда атлар булмау да күңелне тешермәде. Матур милли җыр, көйләрне машиналардан яңгыратып, җырлап, биеп, рәхәтләнеп, гөр килеп сөлге җыйдык! Ярдәмгә килгән яшьләребезгә, безнең белән бер сулышта булган машина хуҗаларына, якты йөз, тәмле сүз белән каршы алган авылдашларыбызга, мең рәхмәт! Сабантуйларны да бергә-бергә, күңелле итеп уздырып җибәрергә насыйп булсын, - дип сөйли Күлбаш мәдәният йорты мөдире Гөлчәчәк Исмәгыйлева.