«ДАГЫСТАН» САФКА БАСТЫ

«А.М. Горький исемендәге Яшел Үзән заводы» акционерлык җәмгыятендә төзелеп, «Дагыстан» исеме бирелгән яңа кораб Каспий флотына барып җитте. Каспий диңгезенә барып чыкканчы, ул 2500 чакрым юл узган.
Россия Хәрби-диңгез флотында беренче буларак, Яшел Үзәндә төзелгән кораб яңа төр корал - «Калибр-НК» ракета комплексы белән коралланган. Кара диңгездә үткәрелгән дәүләт сынауларында экипаж әлеге ракеталар белән атып яхшы нәтиҗәләр күрсәткән. Кораб җәй беткәнче дәүләт сынауларының бар төрен үтеп бетеп, Каспий диңгезе флотында теркәлергә тиеш. «Дагыстан» көз көне Каспий диңгезендә үткәреләчәк «Кавказ-2012» өйрәнүләрендә катнашачак.