Кыяр үстерү өчен файдалы киңәшләр

Фото: редакция архивыннан

Температура: көндез +22...+26, төнлә +15°Стан да түбән түгел. Суыту куркынычы булганда, түтәлне томалагыз.

Дымлылык: теплицада 80% булырга тиеш.

Җилләтү: теплицада үтәли җил булмасын, эсседә җилләтегез.

Су сибү: +22...+25 гра­дуслы җылы су һәм яфракларга тидермәскә тырышып, тамыр төбенә генә сибегез. Салкын су стресс бирә, кыяр әче була һәм авыруларга китерә.

Ашлау: чәчәк атканда, җимшәннәр булсын өчен, калий һәм фосфор (агач көле, калий сульфаты) кирәк. Ә кыяр бирә башлагач, микроэлементлар белән калий. Тамырга бирелә торган белән коендыру аша тукландыруны чиратлаштырыгыз. Тамырларны яндырмас өчен, ашламаны бары тик су сипкәннән соң гына кертегез.

Куак итеп формалаштыру: беренче 4-5 яфрак култыгыннан чыккан үсентеләрне һәм җимшәннәрне өзегез. Ян ботакларны 2-3нче яфраклар өстеннән «чеметегез». Төп кәүсә сезгә кирәкле биеклеккәчә үскәч, очын кисегез. Бу үсемлекнең көчен уңыш китерүгә юнәлдерер.

Вакытында җыю: кыярларны һәр 1-2 көн саен өзеп барыгыз, эсседә – көн дә. Артык үскән кыярлар яңалары барлыкка килүен тоткарлый.

Авыруларга каршы: үсемлекне йодлы катнашма (10 л су + 10 тамчы йод + 1 л эремчек суы яки сөт) яки сарымсак төнәтмәсе белән даими коендырыгыз. Бу ончыл чык­тан һәм пероноспороздан (ялган ончыл чык) саклый.

Мульчалау: салам яки чабылган үлән катламы (5-6 см) дым тота, тамырларны эсседән саклый һәм чүп үләннәрен үстерми.

Бәйләү: һәр төпне, җирдә ятмасын һәм яхшы җилләнсен өчен, күтәртеп бәйләгез.

Күзәтегез: яфракларның саргаюы, кырыйлары агару, кыярларның формалары ямьсезләнү – ашлау яки суны дөрес сипмәү турында сигнал.