Авыл халкы өчен хәзер шактый күп программалар эшли – 3%лы ипотекадан алып белгечләргә бер тапкыр бирелә торган түләүләргә кадәр. Бу чаралар турында күпләр белми калырга да мөмкин. 2025- 2026 елларга актуаль булган төп яңалыклар турында сөйләшик.
Авыл ипотекасы: 3% ставка белән
2025 елдан программа адреслы: кредитны АПК (авыл хуҗалыгы предприятиеләрендә, фермерлык хуҗалыкларында, эшкәртү юнәлешендә), социаль өлкә (табиблар, укытучылар, мәдәният хезмәткәрләре, социаль хезмәт күрсәтүчеләр), Ветеринария һәм Авыл хуҗалыгы министрлыгы, Балыкчылык федераль агентлыгы, Россельхознадзор карамагындагы оешмаларда эшләүчеләр, муниципаль хезмәткәрләр, ИПлар һәм МХО катнашучылары гаиләләре ала ала.
Ставка – ел саен 0,1дән алып 3 проценткача, сумма – 6 миллион сумга кадәр (ир дә, хатын да һәрберсе бер объектка 6 миллион алырга мөмкин), срок – 25 елга кадәр.
! Мөһим шартлар: беренче 5 елда һәр 6 ай саен профильле өлкәдә эшләвен расларга кирәк, сатып алынган йортта 180 көн эчендә теркәлергә, ә өй әзер булса – ул физик заттан алганда 5 елдан, юридик заттан алганда 3 елдан артмаган булырга тиеш.
Авыл стажы өчен пенсиягә өстәмә
Авыл хуҗалыгында 30 ел стажы булган эшләмәүче пенсионерларга пенсиянең фиксацияләнгән өлешенә 25% өстәмә бирелә. 2026 елда бу –ай саен 2 396,17 сум.
Мөһим нәрсәләр:
- өстәмәнең хокукы расланган булса, шәһәргә күчү аны бетерми;
- 2026 елдан Социаль фонд өстәмәне автомат рәвештә исәпли – аерым гариза бирү кирәкми (әмма пенсионер яңа гына эштән китсә, гариза таләп ителә);
- исемлектә 500дән артык профессия: тракторчылар, савымчылар, агрономнар, ветеринарлар, умартачылар һ.б. Колхозда 1992 елга кадәр хисапчы яки сәркатип булып эшләү дә стажга кертелә.
Белгечләр өчен «Земский» программалар
Татарстанда авылга күчеп эшләгән белгечләргә бер тапкыр түләү бирәләр.
- Табиблар – 1 млн сум, фельдшерлар һәм шәфкать туташлары – 500 мең сум (ерак урыннарда – 1,5 млн һәм 750 мең сум).
- Укытучы, тренер, мәдәният хезмәткәре – һәрберсенә 1 млн сум.
- Авыл хуҗалыгы җитештерү комплексында (АПК) яшь белгечкә – 750 мең сум плюс ел буе ай саен 7,5 мең сум.
Шарт: табиб, укытучы, тренер һәм мәдәният хезмәткәре 5 ел, АПК белгече 3 ел эшләргә тиеш. Программалар 2030 елга кадәр гамәлдә. Вакыттан алда китсәң, акчаны кире кайтарырга туры килә.
Яңалык: 2027 елдан авылда эшләүче яшь ветеринарларга 500 мең сум түләячәкләр (ел саен 6 белгечне кабул итәләр).
Нет комментариев