Файдалы кеше булырга тырыш — Раил хәзрәт Фәйзрахманов вәгазе

Ләкин бер нәрсә турында еш онытабыз:
без бу дөньяга алу өчен түгел — бирү өчен килдек.

Аллаһ Тәгалә безне бер-беребезгә файда китерсен өчен яратты.
Кеше ялгыз яши алмый. Ул һәрвакыт башкаларга мохтаҗ.

Ләкин бүгенге көндә нинди кешеләр күбәйде?
Үзенә кирәк булганда гына аралашучы…
Файда беткәч — юкка чыгучы…

Андый кешеләр бар, һәм алар аз түгел…
Ләкин андыйлардан җәмгыятькә дә, дингә дә файда юк.

Ә без нинди булырга тиеш?

Сөекле Пәйгамбәребез ﷺ әйткән:
“Сезнең иң хәерлеләрегез — кешеләргә күбрәк файда китерүчеләрегез.”

Уйлап карагыз, кардәшләрем…

Файда китерүнең юллары бик күп.

Бәлки син бай түгелсең…
Ләкин син:
— берәүгә яхшы сүз әйтә аласың
— киңәш бирә аласың
— ярдәм кулы суза аласың

Һәм болар барысы да — сәдака!

Пәйгамбәребез ﷺ әйткән:
— яхшы сүз — сәдака
— юлдан чүпне алу — сәдака
— кешене дуслаштыру — сәдака

Карагыз нинди җиңел гамәлләр!
Ләкин без нигәдер аларны эшләмибез…

Нигә?

Чөнки күңелдә ялкаулык бар…
“Иртәгә эшләрмен…”
“Башкалар эшләр әле…” — дибез…

Менә иң куркыныч уй шул:
“Мин эшләмәсәм дә, башкалар эшләр.”

Ә син үзең, кардәшем?

Син бүген кемгә файда китердең?
Берәүнең хәлен сорадыңмы?
Берәүгә ярдәм иттеңме?

Кич белән үзеңә сорау бир:
“Мин бүген кемгә кирәк булдым?”

Әгәр җавап юк икән…
димәк, без югалтуда…

Мәсәлән, мәчет төзелә ди.
Кайберәүләр әйтә:
“Минем акча юк, байлар төзесен”.

Ләкин Аллаһ синнән зур сумманы сорамый!
Ул синнән "ихласлык" сорый.

Бәлки синең кечкенә өлешең
Аллаһ каршында зуррактыр,
байның зур акчасыннан да…

Чөнки:
“Тамчыдан күл җыела.”

Кардәшләрем!
Әгәр һәрберебез:
“Миннән дә файда булсын”, — дип яшәсә…

Безнең өммәт нинди көчле булыр иде!
Безнең милләт ничек күтәрелер иде!

Аллаһ Тәгалә безне:
— файдалы
— ихлас
— кешеләргә кирәкле бәндәләрдән итсен.

Көн саен изгелек кылырга насыйп әйләсен.
Һәм безне буш, файдасыз гомердән сакласын.
Әмин.

Раил хәзрәт Фәйзрахманов

Догалы йорт