Яшел Үзән районы кадрлар мәсьәләсен максатчан белем биреп чишәргә ниятли

Яшел Үзән районы кадрлар мәсьәләсен белем бирү учреждениеләре белән максатчан килешүләр төзү юлы белән чишәргә ниятли. Бу хакта бүген ТР Президенты каршындагы Эшкуарлык советының киңәйтелгән утырышында Яшел Үзән районы башлыгы Александр Тыгин хәбәр итте. 

"Безнеңчә, хезмәт хакын арттырып, сыйфатлы социаль пакет һәм эшләү өчен уңайлы шартлар булдыру кирәк. Кече һәм урта эшмәкәрлектә тагын бер мәсьәлә бар. Әлегә анда хезмәт мөнәсәбәтләре мохите булдырылмаган", - диде Александр Тыгин. 

Моның өчен эшмәкәрләргә берлек булдырырга кирәк дигән тәкъдим ясады җитәкче. Шулай ук кадрлар булдыру өчен белем бирү учреждениеләре белән килешү төзү вариантын да карарга кирәклеген ассызыклады. 

"Бу бизнесның хезмәт ресурслары ихтыяҗын билгелиячәк. Белем бирү учреждениеләре исә аларны әзерләргә тиеш була. Муниципалитет бу очракта координатор һәм диалог өчен мәйдан булачак", - диде Тыгин һәм әлеге килешүләр бу елның дүртенче кварталында имзаланачагын әйтте. 

Татарстан Президенты Рөстәм Миңнеханов: "Синең сатып алучың кем икәнен, белгечкә кем заказ бирүен аңларга кирәк. Безнең белем бирү учреждениеләре үзләре ясый белә торган әйберне түгел, ә базар таләп иткәнне ясарга тиеш", - диде. 

Бу хакта тулырак: https://tatar-inform.tatar/news/2019/07/04/189266/

Фото: tatarstan.ru