Көньяк Сабантуй Ставрополь төбәгендә старт алды

Бүген Ставрополь краеның Ипатов районы Кече Барханчак авылында IV Көньяк Сабантуй узды, анда Россиянең 8 төбәгеннән кунаклар җыелды.
Бәйрәм урыны очраклы гына сайланмаган - авыл җирлегендәге табигать кочагындагы ачык киңлек Сабантуйның тарихи тамырларына әйләнеп кайта.

Татарстан Рәисенең сәламләү хатын Бөтендөнья татар конгрессы Башкарма комитеты җитәкчесе урынбасары Фәрхәт Латыйпов җиткерде.
Яшел Үзән районы башлыгы Михаил Афанасьев бәйрәм кунакларына сәламләү сүзе белән мөрәҗәгать итте.
 

- Көньяк Сабантуй - тарихи традиция: ел саен бәйрәм Россиянең төрле төбәкләреннән килгән татарларны берләштерә. Элегрәк Яшел Үзән районы Көньяк Сабантуйны Дагестанда, Новосибирскида, ике ел рәттән Дондагы Ростов шәһәрендә үткәргән иде. - Ел саен бәйрәм зурая бара һәм бөтен ил буенча яңа дуслар таба! - диде Афанасьев.

Рәсми өлештән соң бәйрәм концерты булды, анда җирле һәм Татарстан артистлары, шул исәптән «Бәрмәнчек» дәүләт фольклор ансамбле, татар эстрадасы йолдызлары Дилә һәм Булат Нигъмәтуллиннар, «Риваятъ» фольклор -төркеме, алып баручы Булат Бәйрамов чыгыш ясады.

Кунаклар милли ишегалларын карады, анда халык-сәнгать кәсепләре һәм татар ашлары күргәзмә-ярминкәсе тәкъдим ителде. Татарстанның бөек мәгърифәтчесе Каюм Насыйри музееның күчмә экспозициясе аерым колорит өстәде.

Капчыкларда йөгерү, чүлмәкләр сугу һәм башка милли уеннарда катнашучылар күп булды. Тагын бер вакыйга - билбау көрәше. Көрәш буенча Россиянең абсолют батыры, тренер һәм Яшел Үзән районында яшәүче Фирдүс Зәйнуллин милли көрәшнең матурлыгын күрсәтте.