Көймә хуҗаларын хәтта якорьдә дә жилет кияргә мәҗбүр иттеләр

Фото: Чулпан Гыйсмәтуллина

Суга йөк һәм пассажир суднолары гына түгел, ә гражданнарның кечкенә көймәләре дә чыга.

Шул ук вакытта, сезон трагедияләр белән башланды инде. Республикада быел көймәдән егылып төшкән ике ир-ат суга баткан. Очракларның берсе «Дубки» бакчачылык ширкәте янында булган. Чагыштыру өчен, узган ел суда 13 кеше һәлак булган – бу соңгы унъеллыктагы иң югары күрсәткеч.

Белгечләр искә төшерә: боз киткәннән соң да сулыклар куркыныч булып кала. Акваториядә су астында яшеренгән, судноларга куркыныч тудыручы әйберләр булырга мөмкин.

Бу сезоннан куркынычсызлыкның яңа таләпләре кертелә. Хәзер дүрт метрга кадәр озынлыктагы көймәдә булган һәркем хәрәкәт вакытында гына түгел, ә якорьдә торганда да коткару жилеты кияргә бурычлы.

Шулай ук суднолар хуҗалары үзләре белән кирәкле документлар алып йөрергә тиеш. Әгәр суднолар теркәлергә тиеш булса – рөхсәтнамә һәм судно документлары мәҗбүри. Башка очракларда шәхесне раслаучы документ таләп ителә.

Коткаручылар кагыйдәләрне үтәргә һәм трагедияләрдән саклану өчен әзерлексез суга чыкмаска чакыра.

Татарстан 24