Чулпан Миңнуллина: «Көмеш җиңүләр өчен алтын хыял!»

Пермьдә һөнәри осталык буенча «Профессионаллар» Россия чемпионатының кызыклы һәм мавыктыргыч финалы узды. Әлеге күренекле сәхнәдә Яшел Үзәннең 9нчы лицее укучысы Чулпан Миңнуллина банк эше буенча иң яхшылар арасында конкуренциядә «көмеш» яулады.

Эшмәкәрлек һәм сервис көллияте мәйданчыгында Чулпан Татарстан Республикасын тәкъдим итеп кенә калмады, моны ул җиңеллек һәм ышаныч белән башкарды. Гаҗәп, әмма аның белән очрашкач ук ихласлыгын тоясың: йөзендә бер там­чы да кос­метика юк, күз ка­рашы ачык һәм акыллы, сөйләме сихерли. Чулпан – чын эзләнүче, инглиз, кытай телләрен өйрәнә, ләкин моның белән генә чикләнми, планда – итальянча.

Чемпионатка җыенганда, Чулпан ял һәм каникулларсыз банк эше дөньясына чума. Лицейның талантлы педагоглары аның потенциалын күреп, уку йортының данын якларга тәкъдим итә. Ул сынатмады – аның аналитик сәләте һәм искиткеч хәтере конкурста төп корал булып чыкты!

Финалда Чулпан балкыды: ул клиент­ларга ышанычлы итеп консультацияләр бирде, банк продуктлары тәкъдим итте һәм опе­ратив рәвештә исәп-хисап опе­ра­цияләрен баш­карды. Нәтиҗәдә нәрсә дисезме? II дәрәҗә Диплом һәм шәхсән Татарстан Республикасы Рәисеннән рәхмәт.

- Тормышымны икътисад белән бәйләргә телим, – дип уртак­лаша Чулпан. – Бу тәҗрибә һәм акчалата бүләк алга таба да үсәргә ярдәм итәчәк. Мин үз портфелемне булдыру өчен приз акчаларын инвестицияләргә планлаштырам, – ди ул горурланып һәм дулкынланып.

Хәзер аның акцияләре, облигацияләре бар һәм Чулпан үзен инвестицияләрдә тәҗрибәсез дип санаса да, ул үз өстенә җаваплылык алудан курыкмый һәм киләчәктә булачак финанс эксперты юнәлешендә беренче адымнарын ясый. Без сиңа ышанабыз, Чулпан, яңа җиңүләр, уңышлар телибез!