Акчагызны сервислар рөхсәтсез ала алмаячак

Фото: Рәзилә Хәйретдинова, «ЯҮ»

2026 елның 1 мартыннан Россия Федерациясенең «Кулланучылар хокукларын яклау турында» Законына кертелгән үзгәрешләр үз көченә керде. Яңа кагыйдәләр буенча, цифрлы сервислар кулланучыларны онлайн-язылулар өчен рөхсәтсез түләүләрдән сакларга тиеш.

Хәзер, әгәр сез 2026 елның 1 мартыннан соң теләсә нинди онлайн-язылуны (музыка, фильмнар, премиум-хезмәтләр һ.б.) бетерсәгез, хезмәт күрсәтүче сезнең банк картагыздан акчаны автомат рәвештә алуны дәвам итә алмаячак.

Яңа закон ни әйтә?

Закон буенча, Интернеттагы сайтлар, мәгълүмат системалары яки компьютер программалары аша абонент килешүе нигезендә хезмәт күрсәткәндә, хезмәт күрсәтүчегә кулланучының элек биргән банк счеты мәгълүматларын яки электрон түләү чаралары турындагы мәгълүматларны даими түләүләр өчен файдалану тыела — әгәр кулланучы бу мәгълүматларны кулланудан баш тартса.

Хезмәт күрсәтүче кулланучыдан аның түләү мәгълүматларын кулланудан баш тартуны, шул исәптән электрон формада да, кабул итәргә бурычлы.

Сезгә нишләргә кирәк?

Хезмәт күрсәтүче сайтта подпискадан баш тартасыз.

Хезмәт күрсәтүче сезнең баш тартуны кабул итәргә тиеш һәм сезнең банк счеты мәгълүматларын түләүләр өчен кулланмаска бурычлы.

Иң мөһиме: хәзер подписканы бетергәч, сезнең акчагыз автомат рәвештә  күчерелмәячәк. Бу — кулланучыларның хокукларын яклауда зур адым. Интернеттан  да, телефоннан да язылуларны куркынычсыз идарә итә аласыз.

Әгәр хезмәт күрсәтүче законны бозса, Роспотребнадзорга яки судка мөрәҗәгать итәргә хокукыгыз бар.

Исегездә тотыгыз: акчагыз — сезнеке, сайтлар сезнең рөхсәтсез аны ала алмый!