«Урман аланында»: Карашәм авылында яшь табигать сөючеләр өчен бик үзенчәлекле чара узды

Яшел үләндә утырып — табигать дөньясына! Бу көнне балалар белән бергә урман аланына кызыклы сәяхәткә чыктык. Чара залда түгел, ә йомшак үлән өстендә, саф һавада оештырылды. Балалар кулларына кызыклы рәсемнәр тотып, табигатьнең гүзәл, чиксез һәм гаҗәеп дөньясына чумдылар.

Язучылар белән танышу һәм викторина

Бәйрәмдә балаларны табигать матурлыгын сурәтләгән танылган язучы-натуралистлар — М. Пришвин, К. Паустовский, В. Бианки һәм Н. Сладковның иҗаты белән таныштырдык. Шулай ук нәниләр өчен танып-белү викторинасы уздырылды: алар кошлар һәм кыргый җәнлекләрнең тавышларын тыңлап, аларның кемнеке икәнен дөрес билгеләделәр.

Иң мөһиме — саклык!

Сәяхәт ахырында урманда үзеңне ничек тотарга кирәклеге турындагы кагыйдәләрне тагын бер кат искә төшердек һәм кабатладык. Табигатьне саклау — безнең уртак бурыч!

Миләүшә Зиннәтуллина