Җиләкле җәннәт бакчасы һәм яңа юллар: Миңнеханов районыбыз үсешен бәяләде

ФОТОРЕПОРТАЖ

Җиләк плантацияләреннән алып агротуризмга кадәр: Яшел Үзән районы ничек яши? Якшәмбе көнне Рөстәм Миңнеханов районыбызга эшлекле сәфәр кылды һәм «Җиләкле үзән» фермер хуҗалыгын карады, яңа глэмпингны бәяләде, җирле хакимиятләр белән авыл хуҗалыгы һәм инфраструктура үсеше турында фикер алышты.

Җиләкләрдән алып туризмга кадәр: республика башлыгын нәрсә гаҗәпләндерде

Визитның беренче тукталу ноктасы, инде 2012 елдан бирле эшләп килүче, «Җиләкле үзән» («Ягодная долина») фермер хуҗалыгы булды. Биредә җиләк, кура һәм Альп җиләге, кара һәм кызыл карлыган үстерәләр. Продукцияне Казанга һәм Яшел Үзәнгә җибәрәләр, ә 800 тонналык заманча мультитемпература комплексында саклыйлар.

– Безнең үз кибетебез дә бар, анда җиләк-җимеш сатабыз, – дип сөйләде хуҗалык җитәкчесе Илдар Ситдыйков. – Ә былтыр, кунаклар җиләк сатып алу гына түгел, табигатьтә дә ял итә алсын өчен, 30 кешегә глэмпинг ачтык.
Миңнеханов плантацияләрне карап чыкты һәм хезмәткәрләр белән аралашты.

Гектардан 34 центнер һәм 12 мең баш терлек

Район активы белән очрашуда Зеленодольск муниципаль районы башлыгы Михаил Афанасьев урып-җыю кампаниясенең барышы турында сөйләде:

– Уртача уңыш – гектардан 34 центнер, ә районда мөгезле эре терлекләр саны 12 меңгә җитте.

Татарстан Республикасы Авыл хуҗалыгы министры Марат Җәббаров, уңышның 40%ы инде җыелган, дип өстәде һәм дәүләт ярдәмен агросәнәгатьне үстерүдә активрак кулланырга өндәде.

Юллар һәм су: Миңнеханов нәрсә вәгъдә итте

Район халкы инфраструктура проблемаларын, аеруча, су белән тәэмин итү һәм юллар темасын күтәрде. Татарстан башлыгы әлеге мәсьәләләр хәл ителәчәк, дип ышандырды.

– Сезгә мәгълүм булганча, безнең җирлеккә Раифа аша бер генә юл алып бара, – дип башлады соравын Бишнә авыл җирлеге башлыгы Илгиз Фәтхуллин. – Берновые Ковали авылы аша тагын бер юл салырга ярамыймы, чөнки христиан бәйрәмнәрендә хәзерге бу юлдан узарлык булмый һәм җирле халык күп сәгатьлек бөкедә торырга мәҗбүр.

– Авыл хуҗалыгына ярдәм итү программалары дәвам итәчәк, – дип ассызыклады республика башлыгы. – Без район үсеше өчен инфраструктураның мөһимлеген аңлыйбыз һәм, һичшиксез, моның белән шөгыльләнәчәкбез.

Визит Зеленодольск районының авыл хуҗалыгында гына түгел, агротуризм юнәлешендә дә үсүен күрсәтте. Ә иң мөһиме – җирле фермерлар республика ярдәменә исәп тота ала.