А.С. Пушкин әкиятләре буенча сәяхәт: Күгәйдә рәсем конкурсы узды

- Безнең Күгәй мәдәният йортында «А.С. Пушкин әкиятләре буенча сәяхәт» темасына балалар өчен рәсем конкурсы үткәрелде. Чараның төп максаты – балаларны А.С. Пушкин иҗаты белән якыннан таныштыру, аның әкиятләренә карата кызыксыну уяту, шулай ук балаларның иҗади сәләтләрен үстерү, – дип язалар Күгәй мәдәният йорты ВК сәхифәсендә.

Конкурста катнашучылар – төрле яшьтәге балалар. Алар буяулар, карандашлар һәм фломастерлар ярдәмендә Пушкинның яраткан әкиятләренә иллюстрацияләр ясадылар. Рәсемнәрендә нәни рәссамнар:

• «Руслан һәм Людмила» поэмасының тылсымлы сюжетларын,
• «Салтан патша турында әкият» геройларын,
• «Балыкчы һәм балык турында әкият»тәге матур диңгез төпләрен,
• «Үлгән патша кызы һәм җиде баһадир турында әкият»не,
• «Алтын әтәч турында әкият»не сурәтләделәр.

Һәр бала үзенең яраткан әкиятен һәм героен кәгазьгә төшерергә тырышты. Рәсемнәр бик матур, төрле-төрле, якты һәм эчтәлекле булып чыкты. Кайбер балалар бер геройны, икенчеләре әкиятнең иң кызыклы мизгелен сурәтләгән. Конкурс җиңүчеләре һәм катнашучылары истәлекле бүләкләр белән бүләкләнде.