Акъегет авылында яз бәйрәме узды

Автор, 24 март 2026 - 10:00

Туган җиребезгә яз килде! Игелекле, рәхим-шәфкатьле язлар, мул җәйләр килсен барыбызга да. Сезне халкыбызның борынгы бәйрәме — язгы яңа ел, Нәүрүз белән чын күңелдән котлыйбыз!

22 март көнне Акъегет мәдәният йорты ишегалдында, китапханә белән берлектә зур бәйрәм оештырылды. Кызыклы уеннар, бәйгеләр, дәртле җыр-биюләр белән үрелеп барган чара авылдашларыбыз күңелендә якты истәлек булып калыр дип ышанабыз.

Олы рәхмәтләребезне белдерәбез:

Бәйрәмне оештыруда зур ярдәм иткән авылдашларыбызга;
Безгә булышып торган уңган кызларыбызга;
Концертта чыгыш ясаган артистларыбызга һәм биючеләребезгә!

Яман чирләр, начар гадәтләр, кайгы-сагышлар язгы кар сулары, язгы ташулар белән агып китсен. Ил-көннәребезгә тынычлык иңсен, бергә һәм бердәм булып, киләсе бәйрәмнәрне дә сау-сәламәт каршыларга насыйп булсын!

Ихтирам белән, Акъегет мәдәният йорты сәнгать җитәкчесе Рәшидә Борһанова