Завод ветеранына истәлек тактасы

Истәлек тактасы­ ветеран яшәгән йортка урнаштырылды. Тантаналы чарада катнашкан район башлыгы Михаил Афанасьев бу шәхеснең безнең шәһәргә юнәлтү буенча килүен һәм суднолар төзелешенә үзеннән зур өлеш кертүен билгеләп узды. Чынлыкта, аны үз вакытында башка яхшырак урыннарга эшкә чакырсалар да, ул Яшел Үзәнне берсенә дә алмаштырмаган. Биредә эшен һәм Ватанга хезмәт итүен дәвам иткән.

– Бүген зур кешегә истәлек тактасы куябыз, – диде А.М.Горький исемендәге завод директоры Александр Филиппов. – Ул безнең хәтердә булганда, һәрвакыт исән булачак. Барыгызны да завод көне белән тәбрик итәм. Заводның киләчәгенә без зур ышаныч белән карыйбыз.

 Катнашучыларны шулай ук «Серго исемендәге завод» АҖнең генераль директоры Радик Хәсәнов, «Ак Барс» суднолар төзү корпорациясе генераль директоры Ренат Мистахов та шушы күркәм дата белән котлады. Истәлек тактасы куелган шәхесне завод тарихыннан аерып карап булмый һәм булмаячак.

Герман Серебренниковның кызы Татьяна Пианковская әтисенең бу шәһәргә 1954 елда килүе һәм шул елдан бирле лаеклы ялга киткәнче шушы заводта эшләве, хәтта дусларын да бервакытта да алмаштырмавы турында искә төшерде. Бу чарага хөрмәтләп килүчеләргә гаиләсе исеменнән рәхмәтен җиткерде.