Кыярларны катнашма белән тукландырабыз: файдалы киңәшләр

Үзебез үстергән! Иң файдалылары һәм иң тәмлеләре! Базарда бит аның «үз бакчамнан» диючеләре дә, сатарга дигәнне тизрәк өлгертү өчен, әллә ниләр сибеп үстерә. Шуңа күрә, иң ышанычлысы – үзеңнеке.
Инде яшелчәләр өлгереп килә дип, аларны тәрбиясез калдырырга әле иртәрәк. Таләп ителгәннәренә соңгы тукландыру кертергә, түтәлләрне чүп үләннәреннән арындырып, йомшарту – июль аеның мөһим эшләре. Кыяр-помидорлар көзгәчә уңыш бирсен, дисәгез, өлгергән берен өзеп алу гына җитми, аларга көч тә бирергә кирәк.
 

Хәзер кыярларны түбәндәге катнашма белән тукландырсагыз, яхшы булыр: 10 л су белән 1 л сыер тизәге катнашмасына 2 л агач көле,
2 а.к. магний селитрасы һәм 3 а.к. калий селитрасы салып болгатырга. Моны яхшылап су сипкәннән соң һәр кыяр төбенә
1 л кулланырга. Көлдә кыярга кирәкле кырыктан артык микроэлемент бар.
Тагын шуны да истән чыгармагыз, кыярларга +25 градустан да салкынрак су сибәргә кирәкми. Салкын су җимшәннәре коелуга, кәкре-бөкре һәм әче кыярлар үсүгә, гөмбәчек авыруларына китерер­гә мөмкин. +15 градустан түбән булганда атнага ике тапкыр гына су сибегез, салкында аның тамырлары дымны начар үзләштерә һәм чери башлый.

Шулай ук, кыяр артык эссене дә өнәми: +32 градустан арткан кызуда ул кыярланмый. Шуңа күрә, кызу көннәрдә теплицаның кояшлы ягына ак простыня яки тыгыз агрополотно ябыгыз.