Кишер коймаклары

Әйдәгез, менә шундый коймак пешереп карыйк әле.

Бу коймакта, организмда А витаминына әверелүче каротин бар. Ул тире, чәчләр, тырнаклар һәм күрү органнарына бик тә кирәкле витамин. Моннан тыш, кишер клетчаткасы йомшак кына итеп эчне йомшарткыч тәэсир ясый, йөрәк һәм кан тамырлары авыруларын киметә.

Кирәк була:

• Уртача зурлыкта 2 кишер
• 1 стакан сөт яки су
• 1 йомырка
• 1 стакан солы оны яки тарттырылган солы кисәкләре (хлопья) (бодай оны да ярый)
• 200 гр эремчек
• Тәменчә тоз

Кишерне чистартып, вак кыргычтан уарга. Аңа сөт (су), йомырка, он, эремчек, тоз кушып, камыр ясарга. Әгәр дә ул бик сыек килеп чыкса, тагын бераз он өстәгез. Барысын бергә яхшылап бутагач, 20-30 минутка калдырыгыз.

Мичегезне 180 градуска кадәр кыздырыгыз. Табага яки противеньгә махсус кәгазь җәегез һәм кашык ярдәмендә шуңа камырны коймак итеп салыгыз. Араларын күбрәк калдырыгыз, кайнар мичтә ул җәелә.
25-30 минут пешерегез.