Яшелчәләргә ашлау комплексын үзлектән ясыйбыз

Мондый ашлау комплексын үзлектән дә ясарга мөмкинлеген һәркем белә һәм без дә исегезгә төшереп узсак, артык булмастыр.

Томат: июльдә тукландыру өчен помидорларга 10 л суга 1 л сыер тизәге, 20 гр суперфосфат, 20 гр калий сернокислый составы яхшы. Озын булып үсә торган куак төпләренә 2 л, кечкенә һәм уртача биеклектәгеләргә – 1, 1,5 л сибәргә.
Кыяр: аларга үләннәр төнәтмәсе әзерләсәгез дә була. Кычыткан, әрем, тук­ранбаш һәм башка чүп үләннәрен тураклап, савытка тутырырга һәм җылы су салырга. 7-10 көн төнәткәч (кайнаудан туктаган булсын), 1:5 нисбәтендә су белән катнаштырып сибәләр. Июльдә бер тапкыр шундый ашлау һәм икенче – 1 стакан агач көле белән 10 л су төнәтмәсен кулланыгыз.

Борыч: иртә сортлар бу вакытта инде борыч бирә һәм аларны 10 л суга 0,5 л сыер тизәге һәм 300 гр көл катнашмасы белән ашлыйлар. Ә әлегә чәчәктә булганнарга 10 л су белән 10 гр мочевина, 25 гр суперфосфат һәм 20 гр калий сульфаты катнашмасын сибәләр.
Кишер: бу айда аларның тамыразык үстерү стадиясе һәм нитроаммафоска белән ашласаң отышлы. 10 л
суга 30-40 гр катнашманы салып, үсемлек рәтләре арасына сибәргә, ә аннары чиста су белән коендырырга. Түтәлгә көл сипсәгез дә була.

Чөгендер: 10 л суга 1 стакан агач көле төнәтмәсен сибегез. Чөгендер татлы булсын өчен тоз эремәсе белән ашлыйлар (10 л суга 15-20 гр ). Әмма моны сезон дәвамында өч тапкырдан да артык эшләргә ярамый.

Кәбестә: алар эре булсын дисәгез, июльдә һичшиксез ашларга кирәк. 10 л
суга 0,5 л сыер тизәге һәм 0,5 л монофосфат катнашмасын бер төпкә 1 – 1,5 л сибәргә.

Суган: башлары зур булып үссен өчен 10 л су белән 2 а.к. нитрофоска катнашмасын сибәргә. Әзер ашламалардан суган һәм сарымсак өчен Агрикол кулланырга була.

Сарымсак: комп­лекслы ашларга теләсәгез, 10 л суга 10 гр диаммофоска кушып болгатып, сибегез.