Бакчадагы кырмыска һәм беттән арынабыз

Гөбләдән (үлән бете) химиясез ничек котылырга?

Сезгә нибары ике нәрсә – әче кызыл борыч һәм су кирәк булачак.

• 50 гр төелгән кызыл борычны 1 литр суга кушып, 15-20 минут акрын утта кайнатыгыз;
• төн дәвамында төнәтегез һәм сөзеп, 1:4 нисбәтендә, су белән кушыгыз;
• пульверизаторга салып, үсемлекләргә сиптерегез.

Гөблә мондый процедурага түзә алмый, ә яшелчә-җиләк-җимеш һәм чәчәкләрегез исән-имин булыр.

Кырмыскаларны бакчадан ничек куарга?

Бик гади: даруханәдән алынган гадәти нашатырь спирты – сезнең ярдәмче.

Әгәр дә кырмыска оясы үсемлекләр янында булса:

• 10 мл нашатырьны 1 л җылы суга кушып болгатырга;
• ә инде якында үсемлекләр булмаса – эремәне көчлерәк ясарга була;
• шул катнашманы сак кына кырмыска оясына сибегез.

Бер көннән кырмыскалар бакчагыздан китәр. Әгәр дә инде калган булса, процедураны бер атнадан кабатлагыз. Үсемлекләрегез зыян күрмәс, ә чакырылмаган кунаклардан котылырсыз.

Онытмагыз!
Мондый эшләрне һәрвакытта да җилсез көнне башкарыгыз һәм әлеге чаралар белән яшелчә тамырлары тирәсендә еш кайнашмагыз.

Фото: ясалма интеллект программасыннан алынды