Гүзәл Уразова һәм Илдар Хәкимовның кызы Эллариның кулын сораганнар

Фото: соц. челтәрләрдән

Җырчы Гүзәл Уразова һәм Илдар Хәкимовларның концертында күңелле хәл булган. Аларның кызлары Эллариның кулын сорарга сәхнәгә бер егет күтәрелгән.

–  Уф, йөрәк әрни. Сезнең кызыгыз Элларины мин чын күңелдән яраттым. 2 ел элек бер сораган идем инде кулын, килеп чыкмады. Ләкин йөрәккә боерып булмый шул, – ди егет.

«Кияү килгән», – дип гаҗәпләнә моңа Гүзәл Уразова. Илдар Хәкимов исә егеткә «буе ничава» дип бәя бирә. Тамашачылар бу күренештән рәхәтләнеп көлешәләр.

Ахырдан егет җитдирәк темаларга да күчә.

–  Сез үзегезгә лаеклы балалар тәрбияләп үстергәнсез. Без яшьләр өчен сез – чын мәгънәсендә үрнәк гаилә, – ди егет, Хәкимовлар гаиләсенә соклануын белдереп. – Шулай ук 24 ел дәвамында эшләп, тырышып, менә шундый нәтиҗәләргә ирешүегез өчен дә бик зур рәхмәт сезгә, – ди ул, тулы залларга ишарәләп.

Бу мизгелләрдә сәхнәдә Эллари үзе күренми. Ул, әлбәттә инде, әлегә кияүгә җыенмый бугай. Эллари – Гүзәл Уразова һәм Илдар Хәкимовларның беренче кызлары. Ул бүгенге көндә югары белем ала, шул ук вакытта әти-әнисе белән гастрольләргә дә йөри. Яшь җырчының әтисе һәм әнисе белән уртак дуэтлары бар. Соңгы вакытта аерым гына да җырлар яздыра.

Интертат