Күк йөзен саклаучылар: Татарстанда пилотсыз очучы аппаратлар отрядларына контракт буенча хезмәт итүчеләр көтелә

Яшел Үзән хәрби комиссариатының хәрби хезмәткә сайлап алу пункты инструкторы Самат Миңнеханов әйтүенчә, бүгенге көндә БПЛА операторларына ихтыяҗ зур. «Бу — хәзерге сугышның «алтын фонды». Ул гаскәр – экран артында утырса да, дошманның иң мөһим ныгытмаларын, техникасын һәм командование пунктларын юк итә ала. Моның өчен батырлык кына түгел, акыл да кирәк», — ди ул.

Инструктор билгеләп үткәнчә, бүген яшьләр арасында технологик юнәлештәге хәрби хезмәткә кызыксыу арта. Сәбәбе дә ачык: хәзерге заман сугышы — дроннар сугышы. «Безнең егетләр махсус хәрби операция зонасыннан әйләнеп кайтучылар: «Командир, дронсыз хәзер бер урыннан да узу мөмкин түгел. Ул – безнең күзләр, ул – безнең очлы кылыч», – диләр. Шуңа күрә безгә техниканы белгән, йөзеннән яшьлек уты бөркелгән егетләр кирәк», – ди Самат Салаватович.

Өстенлекләр күпме?

Контракт буенча хезмәт итүчеләр өчен дәүләт тарафыннан күп кенә өстенлекләр каралган. Беренчедән – тотрыклы хезмәт хакы, икенчедән – социаль тәэмин ителеш, өченчедән – заманча торак белән тәэмин итү программалары. Әмма инструктор Миңнеханов әйтүенчә, иң мөһиме –  бу хезмәтнең абруе.

«Мин еш кына яшьләргә шуны әйтәм: сез бүгенге Россиянең алдынгы гаскәре булырга мөмкинсез. Дрон операторы – бу хәзер очучыдан да ким түгел. Әгәр син техниканы белсәң, тактиканы аңласаң, синең кулыңда дошманның иң көчле танкын да, читтән идарә ителүче ракетканы да туктатырлык көч бар», — ди ул.

Яшел Үзәннән булган егетләр үткән айларда үзләре теләп контракт төзегән очраклар бар. Берсе, исемен атамаска үтенсә дә, институтны тәмамлагач, программист булып эшләүдән баш тарткан һәм үз теләге белән БПЛА отрядына киткән. Ул: «Мин компьютерда уйный-уйный үстем. Хәзер минем белемем Ватанга чын файда китерсен», – диде. Бу — яңа буынның патриотизмы», — дип сокланып сөйли инструктор.

Кемнәр өчен ачык?

Пилотсыз очучы аппаратлар отрядларына хезмәт итәргә теләүчеләргә таләпләр – сәламәтлек, әхлакый тотнаклык һәм техника белән кызыксыну. «Безгә килүчеләр арасында элеккеге курсантлар да, гражданлык һөнәре булган инженерлар да, хәтта укучылар да бар. Әгәр йөрәгең Ватанга мәхәббәт белән тулы булса, кулларың заманча техниканы тотарга өйрәнгән икән — син безнең отрядта!» — дип өстәде Самат Миңнеханов.

Хәрби комиссариат белгечләре барлык теләүчеләрне Яшел Үзән шәһәренең хәрби комиссариатына мөрәҗәгать итәргә чакыра. «Кил, өйрән, Ватаныңның куркынычсызлыгын тәэмин итүдә алдынгы сафта бул!» – бу – бүгенге көннең иң мөһим чакыруы.

Бүген Татарстанда бурыч – күк йөзен генә түгел, илнең киләчәген сакларлык белгечләр әзерләү. Һәм бу эшкә үз өлешен кертергә теләүчеләр һәрвакыт табыла, дип белдерә хәрбиләр.