Юлда һәр секундның бәясе бар. Ә балалар катнашындагы юл хәрәкәтендә игътибарлылык һәм тизлек режимын үтәү аеруча мөһим. Шушы хакыйкатькә машина йөртүчеләрнең игътибарын юнәлтү максатыннан, «Машина йөртүче! Тизлекне кимет!» профилактик чарасы кысаларында, Әйшә авылында үзенчәлекле акция узды.
Илсөя Садыйкова фотолары
Рәзилә Хәйретдинова видеосы
Акциядә Әйшә гимназиясе укучылары һәм укытучылары, Яшел Үзән районы буенча ЮХИДИ бүлеге хезмәткәрләре һәм «Юл хәрәкәте иминлеге» дәүләт бюджет учреждениесе вәкилләре катнашты.
Яшел Үзән – Казан автомобиль юлы буенда укучылар машина йөртүчеләргә юлдагы җаваплылык турында искәртте. Алар кулларына «Тизлекне 40 км/сәг кадәр чикләгез» дигән кисәтү билгеләре тотып, автомобиль йөртүчеләрне тизлекне киметергә өндәде.
Берничә секунд – зур нәтиҗә
Балалар катнашындагы юл-транспорт һәлакәтләренең күпчелеге олылардан аеруча игътибарлы булуны таләп итә. Тизлек арткан саен, көтелмәгән хәлгә вакытында реакция бирү мөмкинлеге дә кими.
Шуңа күрә, мәктәпләр, балалар бакчалары, ишегаллары һәм башка балалар күп йөри торган урыннарда машина йөртүчеләргә аеруча сак булу зарур. Юлда көтелмәгән хәл килеп чыгарга мөмкинлеген һәрчак истә тотып, тизлекне алдан ук киметү мөһим.
Акция вакытында машина йөртүчеләрнең балалар мөрәҗәгатенә мөнәсәбәте дә уңай булды. Күп кенә автомобиль йөртүчеләр тизлекләрен киметте, кайберләре укучыларга сигнал биреп, аларның тырышлыгын хуплады.
Саннар уйланырга мәҗбүр итә
Яшел Үзән районы буенча ЮХИДИ бүлеге җитәкчесе, полиция подполковнигы Рамил Идиятуллин балалар катнашындагы юл-транспорт һәлакәтләренә бәйле вәзгыятьнең борчу тудыруын билгеләп үтте.
– Бүгенге көндә балалар катнашында 273 юл-транспорт һәлакәте теркәлгән. Аларда 11 бала һәлак булган, 291 бала төрле дәрәҗәдәге җәрәхәтләр алган. Яшел Үзән районында исә 13 юл-транспорт һәлакәтендә 7 баланың гомере өзелгән, 19ы төрле дәрәҗәдәге имгәнүләр алган. Узган елның шул ук чоры белән чагыштырганда, районда аварияләр саны 6га, һәлак булучылар саны 4кә, җәрәхәтләнүчеләр саны 9га арткан, – дип ассызыклады ул.
Бу – коры статистика гына түгел. Һәр сан артында аерым гаилә, өзелгән язмыш һәм якыннарының зур кайгысы тора.
Иминлек – уртак бурыч
Юл хәрәкәте иминлеген тәэмин итү – ЮХИДИ хезмәткәрләренең генә бурычы түгел. Бу эштә һәркемнең җаваплылыгы бар: машина йөртүче дә, җәяүле дә, ата-ана да, педагог та юл кагыйдәләрен төгәл үтәргә тиеш.
Машина йөртүчеләр өчен исә иң мөһим кагыйдәләрнең берсе – тизлек режимын саклау. «40» билгесенә карап, аны гади генә сан дип кабул итәргә ярамый. Аның артында – кеше гомере, бала иминлеге, гаиләләрнең тынычлыгы.
Әйшәдә узган акция дә нәкъ менә шул хакыйкатьне искә төшерде. Балалар кулындагы кисәтү билгеләре һәр машина йөртүчегә бер гади, әмма бик мөһим фикерне җиткерде:
Юлда ашыкмагыз. Тизлекне киметегез. Үзегезне һәм янәшәгездәге кешеләрне саклагыз!
Нет комментариев