«Шәһри Казан»га – 30!

Басманың баш мөхәррире Радик Сабиров фикеренчә, хәзер укучы иң элек газетада матурлык эзли.

Утыз ел элек, 1990 елның 17 августында, «Шәһри Казан» газетасының сигнал номеры чыга. Аның хәзерге баш мөхәррире Радик Сабиров «Татар-информ» хәбәрчесенә басмадан нәкъ менә нәрсә көткәнен сөйләде.

Агентлык әңгәмәдәше сүзләренчә, газета аудиториясе барыннан да элек анда матурлык эзли.

"Интернетта иң популяр темалар - шоу-бизнес һәм фаҗига, ә газета укучысы бу темаларны яратмый. Элек безнең басмада криминаль рубрика иде. Без аны бер колонка сыйфатында кайтарып карадык, тик укучы кабул итмәде. Шунда ук кире элемтә килде ", - дип аңлатты ул.

Баш мөхәррир билгеләп үткәнчә, аудитория бик рәхәтләнеп файдалы киңәшләр, "Сорау-җавап" рубрикасын һәм дин темасына мәкаләләр укый.

"Кешеләрне укудан мәхрүм итәргә кирәкми, чөнки халык яңадан укый башлады. Бу пандемия вакытында бигрәк тә сизелде. Авыр булыр дип курыктык, ә укучыларда, киресенчә, ихтыяҗ туды ", - дип ассызыклады Сабиров. «Шәһри Казан» газетасы баш мөхәррире дә газетаның барлыкка килү вакытларын исенә төшерде. Ул вакытта милләт язмышы темасы актуаль иде һәм әдәбиятка зур игътибар бирелде. Бәлки, бу редакциядә күп шагыйрьләрнең эшләве белән бәйле булгандыр ", - дип фаразлады ул.