Татар Танае авылы ир-егетләре зиратны тәртипкә китерү буенча өмә үткәрде
#яшелүзәнрайонытуганавылым

Татар Танае авылы ир-егетләре зиратны тәртипкә китерү буенча өмә үткәрде

«Исәннәрнең – кадерен бел, үлгәннәрнең – каберен бел», дигән халкыбыз мәкале һәркемгә тормышның иң мөһим кыйммәтләрен искәртә. Көндәлек мәшәкатьләр белән яшәп, кайчакта безне бу дөньяга китергән, тәрбияләп үстергән, үзләреннән соң якты хатирәләр калдырган кешеләрне искә алуның никадәр мөһим булуын онытып җибәрәбез. Ә бит мәрхүмнәрнең каберләрен карап, тәртиптә тоту – аларга булган хөрмәтебезнең бер чагылышы.

Шушы изге бурычны күңелләрендә йөрткән Татар Танае авылы ир-егетләре бердәм булып зиратны чистарту өмәсенә җыелды. Өмә барышында зират территориясе тәртипкә китерелде, агач-куаклардан арындырылды, каберлекләрне карау һәм чистарту эшләре башкарылды.

Бу көнне эш тә җитәрлек булды. Өлкәннәр дә, яшьләр дә читтә калмыйча, кулларыннан килгәнчә ярдәм итте. Чөнки зиратны карап тоту – берничә кешенең генә түгел, ә бөтен авыл халкының уртак җаваплылыгы.

Мондый өмәләрдә катнашу – мәрхүмнәрне хөрмәтләү генә түгел, яшь буынга да матур үрнәк күрсәтү, туган җиргә, авыл тарихына битараф булмау дигән сүз.

Фото: редакция архивыннан

Авыл мәчете имам-хатыйбы Наил хәзрәт Садриев өмәдә катнашучыларга рәхмәтен белдерде:

– Авылыбызның матурлыгы, бердәмлеге һәм киләчәге – үзебезнең кулда. Өмәгә килгән, кул көче белән ярдәм иткән һәр авылдашыбызга чын күңелдән рәхмәт! Күмәк эшнең бәрәкәте зур. Изге ният белән башкарылган һәр гамәлнең савабы булсын. Аллаһ Тәгалә кылган изгелекләрегезне кабул итсен, үзегезгә һәм якыннарыгызга исәнлек-саулык, гаилә бәхете, бәрәкәтле гомер насыйп итсен! Әрвахларыбызның рухлары шат, каберләре нурлы, урыннары җәннәт түрләрендә булсын!

Наил хәзрәт шулай ук авылдашларын киләчәктә дә мондый изге эшләрдә актив катнашырга чакырды. Чөнки зиратта һәркемгә эш табыла, олысы-кечесе үз өлешен кертә ала. Өмәгә килгән һәр кешенең тырышлыгы, ярдәме һәм игелекле нияте уртак эшкә зур өлеш булып кушыла.

Чыннан да, бердәмлек булган җирдә эш тә уң була. Әлеге өмә дә моның ачык мисалы. Авылдашларның бергә җыелып, бер максат белән хезмәт куюы күңелләрдә җылы хисләр уята. Мондый гамәлләр кешеләрне берләштерә, туган авылга булган мәхәббәтне тагын да арттыра.

Әйе, исәннәрнең кадерен белеп, мәрхүмнәрне онытмыйча, үткәннәребезгә хөрмәт белән карап яшәсәк иде. Зиратларыбыз чиста, каберләр тәртиптә, күңелләребез иманлы булсын. Ә Татар Танае авылы халкының шушы матур бердәмлеге киләчәктә дә дәвам итсен!


Нет комментариев