«Норлат балалар йорты»нда мөһим очрашу узды

Бу вакыйга балалар йортларын тәмамлаучыларны яклау һәм берләштерү юлында мөһим адым булды, аларга үз хокукларын һәм мәнфәгатьләрен тормышка ашыру мөмкинлеге бирде.

Чараны ачып, «Ата-ана тәрбиясеннән мәхрүм калган балаларның гаилә корылышына ярдәм итү, Казан шәһәрендә яшәүче гаиләләрне әзерләүгә һәм озатып йөрүгә ярдәм итү үзәге» дәүләт бюджет учреждениесе директоры Светлана Алексеевна Богова җыелучыларны һәм тәрбияләнүчеләрне җылы итеп сәламләде. Ул безнең төбәктә әлеге оешманы булдыруның мөһимлеген һәм кирәклеген ассызыклады, нәкъ менә мондый инициативалар охшаш сынаулар аша узган һәм хәзер бер-берсенә ярдәм итәргә омтылган кешеләр арасында ныклы элемтәләр булдырырга ярдәм итә, дип билгеләп үтте.

Төбәк бүлеге рәисе Низаметдинова Алинә Рөстәм кызы һәм башкарма директор Гыйләҗева Алинә Ильяс кызы утырышта катнашучыларга оешма структурасын, аның эшчәнлек юнәлешенең һәм төбәк бүлегенең эш планын тәкъдим иттеләр. Алар чыгарылыш укучылары арасында багланышларның, тәҗрибә алмашуның ни дәрәҗәдә мөһим булуы, катнашучылар үзләре генә түгел, ә тулаем бөтен җәмгыять тормышын яхшыртырга ярдәм итәчәк проектлар өстендә бергәләп эшләү турында җентекләп сөйләделәр. Җыелыш барышында җирле бүлекчәнең координация советы һәм аның рәисе сайланды. Ибраһимова Румия Җәүдәт кызы, «Бөтен ил балалары» бөтенроссия иҗтимагый оешмасының Яшел Үзән җирле бүлекчәсе рәисе, ихлас күңелдән сәламләү сүзе белән катнашучыларга мөрәҗәгать итте. Ул яңа бүлекнең һәм бөтен төбәк бүлекчәсенең уңышлы үсешенә өметен белдерде, анда катнашучыларның һәркайсы шушы гомуми миссиядә мөһим роль уйнавын билгеләп үтте.

Ул шулай ук балалар йорты директоры Миңнуллина Рәисә Рәшит кызын әлеге эшчәнлектә профессионалларга ярдәм итүнең мөһимлеген ассызыклап, җирле бүлекчәнең попечительләр советын җитәкләргә чакырды.

Җыелышта чыгарылыш укучылары гына түгел, Норлат балалар йорты тәрбияләнүчеләре дә катнашты, бу чарага бердәмлек һәм үзара ярдәмләшү атмосферасын да өстәде. Очрашу җылы, продуктив һәм чын иптәшләрчә атмосферада узды, анда һәркем үзенең фикерләре һәм идеяләре белән уртаклаша алды, шулай ук хезмәттәшлекнең мөмкин булган юллары турында фикер алыша алды.

–  Ышанычыгыз, ярдәмегез һәм бергә эшләргә омтылуыгыз өчен зур рәхмәт! Бу вакыйга өметләр, дуслык һәм уртак казанышлар белән тулы яңа эраның башы булсын! – дип сөйли Норлат балалар йорты җитәкчесе Рәйсә Миңнуллина.