Норлат балалар йорты тәрбияләнүчеләре «тәмле экскурсиягә» барды

Егет-кызлар өчен пекарь эшен күзәтү бик кызык булды. Экскурсиягә әзерлек процессы үзе үк мавыктырды. Мондый оешманың хуш исе генә дә ни тора бит!

Балаларга аңлатуларынча, камыр ризыкларын пешерү өчен кулланыла торган махсус билгеләнгән мондый биналарда тулы тәртип һәм стерильлекне сакларга кирәк. Һәр кеше, килеп кергәндә, кулларын юарга, ә чәчләрен махсус башлык астына яшерергә тиеш. Балалар белгечләрнең үз эшләрен ничек башкаруын сокланып күзәтте, икмәкнең ничек үстерелүен, онны ничек эшкәртүләрен, икмәк-күмәч эшләнмәләренең нинди төрләре булуын белде, җитештерүнең барлык этаплары белән танышты, кечкенә камыр кисәкчекләренең тәмле икмәккә һәм батонга әверелгәнен күзәтте. Бу тәмле экскурсия балаларның күңелен күтәрде.

Норлат балалар йорты җитәкчесе Рәисә Миңнуллина