2024 олы ачасырлылар өчен нәтиҗәле ел булды

Килгән кунакларны, ә алар арасында район башлыгы Михаил Афанасьев, Яшел Үзән прокуроры Дмитрий Ерпелев та бар, «Зөбәрҗәт» ансамбле кызлары күркәм чыгышлары, кул осталары, һөнәрчеләр үзләренең тәмле ризыклары, җитештергән азык-төлек күргәзмәсе белән каршы алды.

Узган елгы, шундый ук очрашуда билгеләнгән максатларның күбесе тормышка ашкан, мәдәният йорты куллануга тапшырылган. Шуңа да хисап сессиясендә катнашучыларның кәефе күтәренке иде дисәм, ялгышмам. Әлбәттә, җирлек башлыгы Илнур Саттаров үз чыгышында дулкынланды. Район җитәкчелеге алдында сөйләү җиңел эш түгелдер. Иң мөһиме хезмәтең өчен йөз кызарырлык булмасын.

– Узган җыенда иң зур проблема – су башняларын алыштыру мәсьәләсе күтәрелде. Район башлыгы Михаил Афанасьев, булыр, эшлибез, дип ышандырып китте. Вәгъдә генә булып калмады: Олы Ачасырда 2 су башнясы куелды, Бишбатманда 700 метр суүткәргеч челтәре ремонтланды һәм 1 су башнясы урнаштырылды. Шулай ук К.Насыйри исемендәге архитектура-этнография комплексын капиталь төзекләндерү проблемасы кискен тора иде, ел ахырында эшләр башланды, түбәсе ябылды һәм быел дәвам итә, – дип, сүзен башлады Илнур Саттаров.

Гомумән, 2024 ел олы ачасырлылар өчен нәтиҗәле булган. «Иң яхшы авыл җирлеге» бәйгесендә катнашып, 2 млн сумлык грант отканнар. 1 700 000 сумга зират коймаларын яңартканнар. 460 метр койма грант акчасына эшләнсә, 186 метры халык акчасына башкарылган. Әйе, авыл халкы бу изге эшкә бердәм булып 688 450 сум акча җыйган. «Эшне дәвам итәр өчен тагын 121 250 сум акчабыз калды. Авыл халкы мәңгелек йортыбызны чистартуда бик актив катнашты, купме корыган агачлар кырылды, тирә-юнь чистарып, ачылып калды», – дип , җирлек башлыгы битараф булмаганнарның актив хезмәте өчен рәхмәт белдерде.  

Җирлектә башкарылган зур эшләр һәм быелга бурычлар турында газетабызның № 10 (14 март, 2025 ел) санында укырга мөмкин.